നെടുങ്കണ്ടം:അതിദാരിദ്ര്യ നിർമാർജന പദ്ധതിയുടെ ഭാഗമായി നെടുംകണ്ടംബ്ലോക്ക് പരിധിയിലെ ഗ്രാമപഞ്ചായത്തുകൾ തയ്യാറാക്കിയ മൈക്രോപ്ലാൻ അവതരണവും ശില്പശാലയുംബ്ലോക്ക് പഞ്ചായത്ത് വൈസ് പ്രസിഡന്റ് റാണിതോമസ് ഉദ്ഘാടനം ചെയ്തു.ബ്ലോക്ക് പഞ്ചായത്ത്‌ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കെ.റ്റി വർഗീസ് അദ്ധ്യക്ഷത വഹിച്ചു.
ബ്ലോക്ക് പഞ്ചായത്ത് സെക്രട്ടറി എം.കെ ദിലീപ് പ്ലാൻ അവതരിപ്പിച്ചു. ഏഴ് പഞ്ചായത്തുകളിൽ നിന്നുമായി 192 കുടുംബങ്ങളെയാണ് പട്ടികയിൽ ഉൾപ്പെടുത്തിയിരിക്കുന്നത്. അടിയന്തിര, ഹ്രസ്വകാല, ദീർഘകാല പദ്ധതികളുടെ നടത്തിപ്പിനായി മൈക്രോപ്ലാനിൽ ഉൾപ്പെട്ട 192 കുടുംബങ്ങൾക്ക് ഒൻപത്‌കോടിയോളം രൂപ അടങ്കൽ ഉൾപ്പെടുന്നബ്ലോക്ക് തല ക്രോഡീകൃത പദ്ധതി നടപ്പിലാക്കുന്നതിന്‌യോഗത്തിൽ തീരുമാനമായി. ബ്ലോക്ക് പഞ്ചായത്ത് ഹാളിൽ നടന്ന ചടങ്ങിൽ പഞ്ചായത്ത് പ്രസിഡന്റുമാർ,ബ്ലോക്ക് പഞ്ചായത്ത് അംഗങ്ങൾ, ഗ്രാമ പഞ്ചായത്ത്‌ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻമാർ, വിവിധ വകുപ്പ് പ്രതിനിധികൾ തുടങ്ങിയവർ പങ്കെടുത്തു.
മൈക്രോ പ്ലാനുകൾ നടപ്പാക്കും
ത്രിതല പഞ്ചായത്തുതലത്തിൽ അതിദരിദ്രരെ കണ്ടെത്തുന്നതിനുള്ള സർവ്വേ നടപടികൾ പൂർത്തീകരിച്ചിരുന്നു. ഇതിനുശേഷം ഓരോ കുടുംബത്തിനും മൈക്രോപ്ലാൻ തയ്യാറാക്കുന്നതിനായി ജനപ്രതിനിധികൾക്കും സി. ഡി. എസ്. അംഗങ്ങൾക്കും പഞ്ചായത്ത്, വാർഡ്തല സമിതി അംഗങ്ങൾക്കുമായി കിലയുടെനേതൃത്വത്തിൽ പരിശീലനവും നൽകി.ബ്ലോക്ക് പഞ്ചായത്തിന് കീഴിലെ ഏഴ് ഗ്രാമ പഞ്ചായത്തുകളിലും സർവേ നടത്തി ഓരോ കുടുംബത്തിനും പ്രത്യേകം തയ്യാറാക്കിയ മൈക്രോ പ്ലാനുകൾയോഗത്തിൽ അവലോകനം ചെയ്യുകയും അംഗീകരിക്കുകയും ചെയ്തു. ഭക്ഷണം,പോഷകാഹാരം, ആരോഗ്യം, വിദ്യാഭ്യാസം, പാർപ്പിടം, ചുറ്റുപാട്, വരുമാനം തുടങ്ങി വിവിധമേഖലകളിൽ അന്വേഷണം നടത്തി ഓരോ കുടുംബത്തിനും വിശദമായ മൈക്രോപ്ലാനാണ് തയ്യാറാക്കിയിരിക്കുന്നത്.