കട്ടപ്പന: അപ്രതീക്ഷിതമായുണ്ടാകുന്ന ദുരന്തത്തെ എങ്ങനെയാണ് നമ്മൾ പ്രതികരിക്കേണ്ടതെന്ന് അറിഞ്ഞിരിക്കേണ്ടത് അത്യാവശ്യമാണെന്നും അതിന് ഭാവിയുടെ പ്രതീക്ഷയായ കുട്ടികളെ സജ്ജരാക്കേണ്ടത് പ്രധാനമാണെന്നും ജില്ലാ കളക്ടർ ഷീബ ജോർജ് പറഞ്ഞു.. സമൂഹത്തിൽ ദുരന്തപ്രതിരോധ അവബോധം സൃഷ്ടിക്കുന്നതിനായി സംസ്ഥാന ദുരന്ത നിവാരണ അതോറിറ്റി നടപ്പിലാക്കുന്ന 'സജ്ജം' പരിപാടിയുടെ ഭാഗമായി അന്താരാഷ്ട്ര ദുരന്ത ലഘൂകരണ ദിനാചരണത്തിന്റെ ജില്ലാതല ഉദ്ഘാടനവും പരിശീലന പരിപാടികളും കട്ടപ്പന ഗവ. ട്രൈബൽ ഹയർ സെക്കണ്ടറി സ്‌കൂളിൽ ഉു്ഘാടനം ചെയ്യുകയായിരുന്നു കളക്ടർ. ഇടുക്കി ആർ.ഡി.ഒ എം. കെ ഷാജി അദ്ധ്യക്ഷത വഹിച്ചു.
ദുരന്ത നിവാരണ അതോറിറ്റി നടപ്പിലാക്കുന്ന 'സജ്ജം' പരിപാടിയുടെ ഭാഗമായി ജില്ലയിലുടനീളം താലൂക്ക് അടിസ്ഥാനത്തിൽ വിവിധ ബോധവൽക്കരണ, പരിശീലന പരിപാടികളും സംഘടിപ്പിച്ചു. ദിനാചരണത്തിന്റെ ഭാഗമായി കട്ടപ്പന ഗവ. ട്രൈബൽ സ്‌കൂളിൽ സംഘടിപ്പിച്ച പരിശീലന പരിപാടിക്ക് താലൂക്ക് ആശുപത്രി ജൂനിയർ കൺസൽട്ടന്റ് ഡോ. റെയ്‌ന ജെ.എസ്, കട്ടപ്പന ഫയര്‍‌സ്റ്റേഷൻ സ്റ്റേഷൻ ഓഫിസർ വരുൺ എസ്. എന്നിവർ നേതൃത്വം നൽകി.
കട്ടപ്പന ഡിവൈ.എസ്.പി വി.എ നിഷാദ്‌മോൻ, ജില്ലാ മെഡിക്കൽ ഓഫീസർ ഡോ.സുരേഷ് വർഗീസ് , വിദ്യാഭ്യാസ ഉപഡയറക്ടർ ബിന്ദു.കെ, ഇടുക്കി തഹസിൽദാർ ജെയ്ഷ് ചെറിയാൻ, കട്ടപ്പന മുനിസിപ്പൽ സെക്രട്ടറി പ്രകാശ് കുമാർ വി, ഗവ. ട്രൈബൽ സ്‌കൂൾ പ്രിൻസിപ്പാൾ ഇൻ ചാർജ് സൂസൻ ഫിലിപ്പ്, ഗവ. ട്രൈബൽ സ്‌കൂൾ ഹെഡ്മാസ്റ്റർ രാജി എം, പി. ടി. എ. പ്രസിഡന്റ് ജേക്കബ് ജോസ്, ജില്ലാ ദുരന്തനിവാരണ അതോറിറ്റി ലെയ്‌സൺ ഓഫിസർ കെ. കെ. വിജയൻ, ഹസാർഡ് അനലിസ്റ്റ് രാജീവ് ടി. ആർ, തങ്കച്ചൻ എൻ.ഡി, കെ.പി ജയ്‌മോൻ തുടങ്ങിയവർ പങ്കെടുത്തു.