നെടുങ്കണ്ടം: കയർ വികസന വകുപ്പും നെടുംകണ്ടം ബ്ലോക്ക് പഞ്ചായത്തും മഹാത്മാഗാന്ധി ദേശിയ തൊഴിലുറപ്പ് വിഭാഗവും സംയുക്തമായി 'തൊഴിലുറപ്പും കയർ ഭൂവസ്ത്ര വിതാന സാദ്ധ്യതകളും' എന്ന വിഷയത്തിൽ ഏകദിന ശില്പശാല സംഘടിപ്പിച്ചു. നെടുങ്കണ്ടം ഗ്രാമ പഞ്ചായത്ത് കമ്യൂണിറ്റി ഹാളിൽ നടത്തിയ സെമിനാർ ബ്ലോക്ക് പഞ്ചായത്ത് വൈസ് പ്രസിഡന്റ് റാണി തോമസ് ഉദ്ഘാടനം ചെയ്തു. നെടുംകണ്ടം ഗ്രാമ പഞ്ചായത്ത് പ്രസിഡന്റ് ശോഭന വിജയൻ അദ്ധ്യക്ഷത വഹിച്ചു.
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി വഴി സംസ്ഥാന സർക്കാർ നടപ്പാക്കുന്ന കയർ ഭൂവസ്ത്ര വിതാനം പദ്ധതി, ബ്ലോക്കിൽ കൂടുതൽ വ്യാപിപ്പിക്കുന്നതിന്റെ ഭാഗമായാണ് സെമിനാർ സംഘടിപ്പിച്ചത്. വെള്ളത്തിന്റെ ഒഴുക്കിന്റെ വേഗത കുറച്ചു മണ്ണൊലിപ്പ് തടയുന്നതിനും മണ്ണിലെ ഈർപ്പം നിലനിർത്തി അന്തരീക്ഷത്തിലെ താപനില കുറയ്ക്കുന്നതിനും തോടുകൾ, കുളങ്ങൾ, നീർച്ചാലുകൾ എന്നിവയുടെ തീര സംരക്ഷണത്തിനും മറ്റും കയർ ഭൂവസ്ത്രം ഉപയോഗിച്ചുവരുന്നു. കൂടാതെ കയർ നിർമ്മാതാക്കൾക്ക് പ്രാദേശിക വിപണയിൽ കൂടുതൽ കയർ വിൽക്കാൻ സാധിക്കുമെന്നതും തൊഴിലവസരങ്ങൾ സൃഷ്ടിക്കുമെന്നതും പദ്ധതിയുടെ നേട്ടമാണ്.
'തൊഴിലുറപ്പും കയർ ഭൂവസ്ത്ര വിതാന സാധ്യതകളും' എന്ന വിഷയത്തിൽ സംഘടിപ്പിച്ച സെമിനാറിൽ ടെക്‌നിക്കൽ സർവീസ് പ്രൊവൈഡർ രാഹുൽ ആർ. കുറുപ്പ് വിഷയാവതരണം നടത്തി. തുടർന്ന് നെടുംകണ്ടം ബ്ലോക്കിന് പരിധിയിൽ തൊഴിലുറപ്പ് പദ്ധതിയിൽ ഏറ്റവും കൂടുതൽ കയർ ഭൂവസ്ത്രം വിരിക്കുന്ന പ്രവൃത്തി ഏറ്റെടുത്തു നടത്തിയ നെടുങ്കണ്ടം ഗ്രാമപഞ്ചായത്തിനെ ആദരിച്ചു. ചടങ്ങിൽ ഗ്രാമപഞ്ചായത്ത് പ്രസിഡന്റുമാർ, ബ്ലോക്ക് പഞ്ചായത്ത് അംഗങ്ങൾ, കയർ വികസന വകുപ്പ് പ്രൊജ്ര്രക് ഓഫീസർ സ്മിത ജേക്കബ് തുടങ്ങിയവർ പങ്കെടുത്തു.