തൊടുപുഴ: കനറാ ബാങ്ക് ശാഖകളിലെയും ഓഫീസുകളിലെയും ഹൗസ് കീപ്പിംഗ് ജോലികൾ പുറം കരാർ നൽകുന്നതിൽ ജീവനക്കാർ പ്രതിഷേധിച്ചു. ശാഖകളിലെ ഹൗസ് കീപ്പിംഗ് ജോലികൾ ടെൻഡർ വിളിച്ച്' പുറം കരാർ നൽകാനാണ് തീരുമാനിച്ചിരിക്കുന്നത്. ഏജൻസിക്ക് കരാർ നൽകിയാൽ നിലവിൽ ജോലി ചെയ്യുന്ന ദിവസക്കൂലിക്കാരെ പർണ്ണമായും ഒഴിവാക്കും. ഈ നിർദേശങ്ങടങ്ങിയ കത്ത് കനറാ ബാങ്ക് ഹെഡ് ഓഫീസിൽ നിന്നും സർക്കിൾ ഓഫീസുകൾക്ക് നൽകിയിരിക്കുകയാണ്. കനറാ ബാങ്കിന്റെ ഈ തൊഴിലാളിവിരുദ്ധ നടപടിക്കെതിരെ കനറാ ബാങ്ക് സ്റ്റാഫ് യൂണിയനും, ബാങ്ക് ടെമ്പററി എംപ്ലോയിസ് ഫെഡറേഷനും (ബി.ഇ.എഫ്.ഐ.) സംയുക്തമായി കനറാ ബാങ്ക് തൊടുപുഴ ശാഖയ്ക്ക് മുമ്പിൽ പ്രതിഷേധ ധർണ്ണ സംഘടിപ്പിച്ചു. ധർണ്ണ ബി.ഇ.എഫ്.ഐ. സംസ്ഥാന ജനറൽ സെക്രട്ടറി എൻ.സനിൽ ബാബു ഉദ്ഘാടനം ചെയ്തു. സന്ദീപ് കെ.എസ്., അനിൽകുമാർ വി. ജി. തുടങ്ങിയവർ സംസാരിച്ചു.