ഇടുക്കി: സംസ്ഥാനത്തെ ഭരണഭാഷ പൂർണ്ണമായും മലയാളമാക്കുക എന്ന പ്രഖ്യാപിത ലക്ഷ്യം കൈവരിക്കുന്നതിന് നവംബർ ഒന്ന് മലയാള ദിനമായും ഒന്നു മുതൽ ഏഴു വരെ ഭരണഭാഷാ വാരമായും ആഘോഷിക്കുന്നതിന്റെ ജില്ലാതല ഉദ്ഘാടനം ഇന്ന് ഉച്ചയ്ക്ക് കളക്ട്രേറ്റ് കോൺഫറൻസ് ഹാളിൽ ജലവിഭവ മന്ത്രി റോഷി അഗസ്റ്റിൻ നിർവ്വഹിക്കും.
വാരാഘോഷത്തിന്റെ ഭാഗമായി ജില്ലാ ഇൻഫർമേഷൻ ഓഫീസിന്റെ ആഭിമുഖ്യത്തിൽ പ്രഭാഷണങ്ങൾ ചർച്ചകൾ സെമിനാറുകൾ തുടങ്ങിയവ സംഘടിപ്പിക്കും. നല്ല മലയാളം കോഴ്‌സ് ഡയറക്ടർ അജയ് വേണു പെരിങ്ങാശ്ശേരി ഭാഷാപോഷണ പ്രഭാഷണം നടത്തും. പ്ലസ് ടു തുല്യത പരീക്ഷയിൽ ഉന്നത വിജയം നേടിയവരെ ചടങ്ങിൽ അനുമോദിക്കും.
ഭരണഭാഷ വാരാഘോഷത്തോടനുബന്ധിച്ചു നാളെ ജില്ലാ ഇൻഫർമേഷൻ ഓഫീസിന്റെ നേതൃത്വത്തിൽ സർക്കാർ ജീവനക്കാർക്കായി വിവിധ വിഷയത്തിൽ രചന മൽസരങ്ങളും സംഘടിപ്പിക്കുന്നുണ്ട്. മലയാളം ഉപന്യാസ രചന, കഥ രചന, കവിത രചന എന്നീ വിഭാഗങ്ങളിലാണ് മത്സരങ്ങൾ നടത്തുക. മത്സരത്തിൽ പങ്കെടുക്കാൻ ആഗ്രഹിക്കുന്നവർ നാളെ രാവിലെ 11.45 ന് സ്ഥാപനത്തിന്റെ ഐഡി കാർഡുമായി ജില്ലാ ഇൻഫർമേഷൻ ഓഫീസ് മീഡിയ ഹാളിൽ ഹാജരാകണം. ഫോൺ: 04862 233036.