മൂന്നാർ: പ്ലസ് വൺ ക്ലാസ്സുകളിൽ പഠിക്കുന്ന ബി.പി.എൽ. വിഭാഗത്തിൽപ്പെട്ട ജില്ലയിലെ മിടുക്കരായ കുട്ടികൾക്കായി സമഗ്ര ശിക്ഷാ കേരളം മുഖേന നടപ്പിലാക്കുന്ന സ്‌കഫോൾഡ് പദ്ധതിയുടെ ദ്വിദിന സംഗമവും സ്‌ക്രീനിംഗ് ക്യാമ്പും മൂന്നാർ ശിക്ഷക് സദനിൽ അഡ്വ. എ. രാജ എം.എൽ.എ. ഉദ്ഘാടനം ചെയ്തു. ജില്ലയിലെ എച്ച്.എസ്.എസ്., വി.എച്ച്.എസ്.ഇ. സ്‌കൂളുകളിലെ പ്ലസ് വൺ കുട്ടികളിൽ സർവെ നടത്തി മികച്ച അക്കാദമിക റിസൾട്ടിനൊപ്പം സാമൂഹികവും സാമ്പത്തികവുമായ പശ്ചാത്തലം കൂടി പരിഗണിച്ച് നടത്തിയ സ്‌കൂൾതല തെരഞ്ഞെടുപ്പിൽ 487 കുട്ടികൾ യോഗ്യത നേടിയിരുന്നു. ഇവരിൽ നിന്നും കണ്ടെത്തിയ ഏറ്റവും മികച്ച 50 വിദ്യാർത്ഥികളാണ് രണ്ട് ദിവസങ്ങളിലായി നടന്ന സ്‌കഫോൾഡ് സംഗമത്തിൽ പങ്കെടുത്തത്.
സംസ്ഥാന സർക്കാർ നടപ്പിലാക്കി വരുന്ന വിവിധ പരിപാടികളിലുൾപ്പെടുത്തി പാർശ്വവൽകൃത സമൂഹത്തിലെ വിദ്യാർത്ഥികൾക്ക് ഉന്നത വിദ്യാഭ്യാസം ഉറപ്പു വരുത്തുന്നതിനും നൈപുണ്യ പരിശീലനം, കരിയർ കൗൺസിലിംഗ്, ഇംഗ്ലീഷ് പരിജ്ഞാന കോഴ്‌സുകൾ, മോട്ടിവേഷൻ ക്ലാസ്സുകൾ തുടങ്ങിയ പ്രോഗ്രാമുകളിലൂടെ ആശയവിനിമയ കഴിവുകളും വ്യക്തിഗത സവിശേഷകളും വളർത്തി മികച്ച കരിയർ ഉറപ്പു വരുത്തുവാൻ ലക്ഷ്യമിട്ട് ജില്ലയിൽ നടപ്പാക്കുന്ന പദ്ധതിയാണ് സ്‌കഫോൾഡ്.
പരിപാടിയിൽ എസ്.എസ്.കെ ജില്ലാ പ്രോഗ്രാം ഓഫീസർ കെ.എ. ബിനുമോൻ, ഡയറ്റ് ഫാക്കൽറ്റി അനിരുദ്ധൻ, സൈക്കോളജിസ്റ്റ് ഷാരോൺ ജോർജ്, സ്‌മേര ജോൺ തുടങ്ങിയവർ പങ്കെടുത്തു.