കോട്ടയം : കടകൾ അടച്ചുപൂട്ടിയിട്ടും അവർക്ക് പോകാൻ മനസ് വന്നില്ല. നിസംഗരായി കടകൾക്ക് മുന്നിൽ ഇരുന്നു. നല്ല കാലത്തി​ന്റെ ഓർമ്മകളെ ഒന്നുകൂടി ചേർത്തുപിടിച്ചു. ഇനിയെന്തെന്ന് ചോദിക്കുമ്പോൾ പലർക്കും ഉത്തരമില്ല. ജീവിതത്തി​ന്റെ താളം നിലച്ചുപോകുന്ന അവസ്ഥയാണെന്ന് സരിത മ്യൂസിക്സ് നടത്തുന്ന ബീന പറയുന്നു. 42 വർഷമായി ടെലിഫോൺ ബൂത്ത് നടത്തിയിരുന്ന വി.എൻ സോമൻ ഷട്ടറിട്ട കടയ്ക്ക് മുന്നിൽ നിന്ന് വിതുമ്പി. തിരുനക്കര ബസ് ​സ്റ്റാൻഡ് ഷോപ്പിം​ഗ് കോംപ്ലക്സിലെ 52 ലൈസൻസികളും ഇന്നലെ കടയൊഴിഞ്ഞ് താക്കോൽ ന​ഗരസഭയിൽ ഏല്പിച്ചു. ഉച്ചയ്ക്ക് ശേഷം റവന്യു ഇൻസ്പെക്ടർ ഷാജിയുടെ നേ‍ത‍ൃത്വത്തിൽ ഉദ്യോ​ഗസ്ഥർ എത്തി കടകൾ സീൽ ചെയ്തു. ഹൈക്കോടതി നിർദ്ദേശപ്രകാരം കോംപ്ലക്സ് പൊളിക്കുന്നതി​ന്റെ ഭാ​ഗമായാണ് വ്യാപാരികൾ കട ഒഴിഞ്ഞത്. കട ഒഴിയാനുള്ള ഉത്തരവ് കാലാവധി വെള്ളിയാഴ്ച അവസാനിച്ചിരുന്നെങ്കിലും സാധനങ്ങൾ മാറ്റാൻ രണ്ട് ദിവസത്തെ സാവകാശം വാങ്ങി തിങ്കളാഴ്ച കട പൂട്ടി താക്കോൽ ഏൽപ്പിക്കാമെന്ന് വ്യാപാരികൾ സമ്മതമറിയിച്ചിരുന്നു. എന്നാൽ ശനിയാഴ്ച ന​ഗരസഭ ഉദ്യോ​ഗസ്ഥർ എത്തി നാല് കടകൾ സീൽ ചെയ്തു.

ഇനിയെന്ത്, പലർക്കും ഉത്തരമില്ല

തിരുനക്കരയിലെ കെട്ടിടം ചരിത്രത്തോട് ചേരുമ്പോൾ ഇനി അവശേഷിക്കുന്നത് ഉത്തരമില്ലാത്ത ചോദ്യങ്ങളാണ്. പലരും സാധനങ്ങൾ വീട്ടിലേക്കാണ് മാറ്റിയത്. ഇനി ഒരു കട തുടങ്ങാൻ സാധിക്കുമോയെന്ന് പലർക്കും അറിയില്ല. ന​ഗരസഭ തങ്ങൾക്ക് ഉചിതമായ പുനരധിവാസം ഉറപ്പാക്കുമോ എന്ന് 52 ഓളം വ്യാപാരികൾക്കും, 350 ഓളം ജീവനക്കാർക്കും ഉറപ്പില്ല. 63 വർഷം പഴക്കമുള്ള എ ബ്ലോക്ക് ആണ് ആദ്യം പൊളിക്കുക. കെട്ടിടത്തി​ന്റെ ഒന്നും രണ്ടും നിലയിലുള്ള ലൈസൻസികളെ നാ​ഗമ്പടം ബസ് ​സ്റ്റാൻഡ് കെട്ടിടത്തി​ന്റെ മുകളിൽ ഒഴിഞ്ഞുകിടക്കുന്ന കടകളിലേക്ക് മാറ്റാനാണ് ധാരണയായത്. താഴെയുള്ളവരെ എ, ബി ബ്ലോക്കുകൾ പൊളിച്ച് അവിടെ പുനരധിവസിപ്പിക്കും. ഹൈക്കോടതിയിൽ ആറിന് നഗരസഭ റിപ്പോർട്ട് സമർപ്പിക്കും.