കോട്ടയം. കൊവിഡ് നിയന്ത്രണങ്ങൾ തീർത്ത രണ്ടുവർഷത്തെ ഇടവേളയ്ക്കുശേഷം താഴത്തങ്ങാടി മത്സരവള്ളംകളിയുടെ ആവേശത്തിലേക്ക്. ചാമ്പ്യൻസ് ബോട്ട് ലീഗിന്റെ ഭാഗമായി 29ന് നടക്കുന്ന കോട്ടയം മത്സരവള്ളംകളിയിലെ ചെറുവള്ളങ്ങളുടെ രജിസ്‌ട്രേഷൻ തുടങ്ങി. വെപ്പ് ഒന്നാം ഗ്രേഡ് വിഭാഗത്തിലുള്ള കോട്ടപ്പറമ്പൻ വള്ളത്തിന്റെ ഉടമയും ക്യാപ്റ്റനുമായ കെ.പി.ഫിലിപ്പോസിന് ആദ്യ രജിസ്‌ട്രേഷൻ നൽകി തിരുവഞ്ചൂർ രാധാകൃഷ്ണൻ എം.എൽ.എ. ഉദ്ഘാടനം ചെയ്തു.

വെപ്പ്, ഇരുട്ടുകുത്തി എ ഗ്രേഡ്, ബി ഗ്രേഡ്, ചുരുളൻ വിഭാഗങ്ങളിലായി കോട്ടപ്പറമ്പൻ, ജയ ഷോട്ട് , മൂന്ന് തൈക്കൻ, തുരുത്തിത്തറ, സെന്റ് ആന്റണീസ്, ദാനിയൽ, സെന്റ് ജോസഫ്, ശരവണൻ, പുന്നത്ര പുരയ്ക്കൽ, ചിറമേൽ തോട്ടുകടവൻ,വേലങ്ങാടൻ എന്നീ ചെറുവള്ളങ്ങൾ രജിസ്റ്റർ ചെയ്തു. രജിസ്‌ട്രേഷൻ 23ന് അവസാനിക്കും.

സി.ബി.എല്ലിൽ ഒൻപതു ചുണ്ടൻവള്ളങ്ങളാണ് മാറ്റുരയ്ക്കുന്നത്. പള്ളാത്തുരുത്തി ബോട്ട്ക്ലബിന്റെ കാട്ടിൽ തെക്കേതിൽ, എ.സി.ഡി.സി.കൈപ്പുഴമുട്ടിന്റെ നടുഭാഗം ചുണ്ടൻ, ആലപ്പുഴ പുന്നമട ബോട്ട് ക്ലബിന്റെ വീയപുരം ചുണ്ടൻ, പൊലീസ് ബോട്ട് ക്ലബിന്റെ ചമ്പക്കുളം ചുണ്ടൻ, കൈനകരി യു.ബി.സിയുടെ കാരിച്ചാൽ ചുണ്ടൻ, കുമരകം വേമ്പനാടു ബോട്ട് ക്ലബിന്റെ പായിപ്പാടൻ ചുണ്ടൻ, കുമരകം ടൗൺ ബോട്ട് ക്ലബിന്റെ സെന്റ് പയസ് ടെൻത്, കുമരകം ബോട്ട് ക്ലബിന്റെ ആയാപറമ്പ് പാണ്ടി, എടത്വ വില്ലേജ് ബോട്ട് ക്ലബിന്റെ ദേവാസ് എന്നീ ചുണ്ടൻവള്ളങ്ങളാണ് ട്രാക്കിലിറങ്ങുന്നത്.

സംഘാടകർ.

ജില്ല ടൂറിസം വകുപ്പ്.

കോട്ടയം വെസ്റ്റ് ക്ലബ്.

തിരുവാർപ്പ് ഗ്രാമപഞ്ചായത്ത്.

കോട്ടയം നഗരസഭ.

വള്ളംകളി മത്സരം: 29ന് .

രജിസ്‌ട്രേഷൻ 23 വരെ.