പാലാ: നഗരസഭയുടെ കീഴിലുള്ള പന്ത്രണ്ടാംമൈൽ കുമാരനാശാൻ ചിൽഡ്രൻസ് പാർക്ക് കൂടുതൽ സജീവമാക്കുന്നു. ഇതിന്റെ ഭാഗമായി നാളെ മുതൽ പാർക്കിൽ കാന്റീൻ, ഐസ്‌ക്രീം പാർലർ കേന്ദ്രങ്ങൾ ആരംഭിക്കുമെന്ന് നഗരസഭാ ആരോഗ്യ സ്റ്റാന്റിംഗ് കമ്മറ്റി ചെയർമാൻ ബൈജു കൊല്ലംപറമ്പിൽ പറഞ്ഞു. നഗരസഭയിലെ പ്രിയദർശിനി കുടുംബശ്രീക്കാണ് കാന്റീൻ ഐസ്‌ക്രീം പാർലർ കേന്ദ്രത്തിന്റെ നടത്തിപ്പ്. സാധാരണ ദിവസങ്ങളിൽ വൈകിട്ട് 3 മുതൽ രാത്രി 7.30 വരെയും അവധി ദിവസങ്ങളിൽ രാവിലെ 10 മുതലും കാന്റീൻ പ്രവർത്തിക്കും. കാപ്പി, ചായ, ഐസ്‌ക്രീം, സ്‌നാക്‌സ് എന്നിവ ഗുണനിലവാരത്തോടെ നിർമ്മിച്ച് പാർക്കിലെത്തുന്നവർക്ക് വിതരണം ചെയ്യും. നാളെ വൈകിട്ട് 4ന് പാലാ നഗരസഭ ചെയർമാൻ ആന്റോ ജോസ് പടിഞ്ഞാറേക്കര കാന്റീനിന്റെയും ഐസ്‌ക്രീം പാർലറിന്റെയും ഉദ്ഘാടനം നിർവഹിക്കും. സ്റ്റാന്റിംഗ് കമ്മറ്റി ചെയർമാൻമാരായ ബൈജു കൊല്ലംപറമ്പിൽ, ബിന്ദു മനു, സി.ഡി.എസ് ചെയർപേഴ്‌സൺ ശ്രീകല അനിൽകുമാർ തുടങ്ങിയവർ ചടങ്ങിൽ പങ്കെടുക്കും.