ചങ്ങനാശ്ശേരി : പൊലീസ് ഉദ്യോഗസ്ഥരെ ആക്രമിച്ച കേസിൽ ചെത്തിപ്പുഴ ഏനാച്ചിറ പുത്തൻപറമ്പിൽ വീട്ടിൽ അനീഷ് (42), മകൻ അജ്മൽ അനീഷ് (19) എന്നിവരെ ചങ്ങനാശേരി പൊലീസ് അറസ്റ്റ് ചെയ്തു. അനീഷ്‌ ജോലി ചെയ്യുന്ന ബസിലെ ജീവനക്കാരും, തണ്ടപ്ര ബസിലെ ജീവനക്കാരും തമ്മിൽ സമയക്രമത്തെ ചൊല്ലി വാക്ക് തർക്കം ഉണ്ടാവുകയും തുടർന്ന് അനീഷും അജ്മലും രാത്രി തണ്ടപ്ര ബസുടമയുടെ വീട്ടിലെത്തി അസഭ്യം പറയുകയായിരുന്നു. വിവരമറിഞ്ഞെത്തിയ പൊലീസ് സംഘം ഇരുവരെയും പറഞ്ഞയ്ക്കാൻ ശ്രമിച്ചെങ്കിലും പോകാൻ കൂട്ടാക്കാതെ പൊലീസിനെ പട്ടിക കഷണം ഉപയോഗിച്ച് ആക്രമിക്കുകയുമായിരുന്നു. സംഭവത്തിൽ എസ്.ഐ ഉൾപ്പെടെയുള്ളവർക്ക് പരിക്കേറ്റു. തുടർന്ന് ചങ്ങനാശ്ശേരി സ്റ്റേഷൻ എസ്.എച്ച്.ഒ റിച്ചാർഡ് വർഗീസിന്റെ നേതൃത്വത്തിൽ കൂടുതൽ പൊലീസെത്തി ഇവരെ അറസ്റ്റ് ചെയ്യുകയായിരുന്നു.