കോട്ടയം. മദ്യം, സിന്തറ്റിക് ലഹരിമരുന്നുകൾ ഉൾപ്പെടെയുള്ളവ ഉപയോഗിച്ച് വാഹനമോടിക്കുന്നവരെ കണ്ടെത്താൻ സാധിക്കുന്ന അത്യാധുനിക ഉപകരണങ്ങളടങ്ങിയ ആൽകോ സ്‌കാൻ വാൻ ജില്ലയിലെത്തി. തിരുനക്കര ​ഗാന്ധിസ്ക്വയറിന് സമീപം ജില്ലാ പൊലീസ് മേധാവി കെ.കാർത്തിക്ക് ഫ്ലാ​ഗ് ഓഫ് ചെയ്തു. വാനിലെ ഉദ്യോ​ഗസ്ഥൻ പൊലീസ് മേധാവിയ്ക്ക് മെഷീൻ പ്രവർത്തനരീതി വിശദീകരിച്ചു. പരീക്ഷണാടിസ്ഥാനത്തിൽ 22 വരെ ജില്ലയിൽ പ്രവർത്തിക്കും. മദ്യം ഉപയോഗിച്ചവരെ തിരിച്ചറിയാൻ ബ്രത്ത് അനലൈസറും, ലഹരികൾ കണ്ടെത്താൻ അബോട്ട് എന്ന മെഷീനുമാണ് വാഹനത്തിലുള്ളത്. ഉമിനീർ പരിശോധനയിലൂടെയാണ് കഞ്ചാവ്, എം.ഡി.എം.എ. ഉൾപ്പെടെയുള്ള ലഹരിവസ്തുക്കൾ ഉപയോ​ഗിച്ചോ എന്ന് തിരിച്ചറിയുക. ഇത്തരക്കാരെ പിടികൂടി വാനിലെത്തിച്ച് പരിശോധിച്ച് മിനിറ്റുകൾക്കുള്ളിൽ റിസൾട്ട് ലഭ്യമാക്കാനാവും. പ്രിന്റും ലഭിക്കും. ആശുപത്രിയിൽ കൊണ്ടുപോയി പരിശോധന നടക്കുന്നത് ഇതിലൂടെ ഒഴിവാക്കാം.

പൂർണമായും ശീതീകരിച്ചതാണ് വാഹനം. ​ബെഡ്, വാഷ് ബേസിൻ, കുടിവെള്ളം, ഫ​സ്റ്റ് എയ്ഡ്, ട്രോമ കിറ്റ് എന്നിവ വാഹനത്തിലുണ്ട്. പരിശോധിക്കുന്ന ആളിന്റെ സ്വകാര്യതയ്ക്ക് തടസമുണ്ടാകില്ല. ഏത് ​സ്റ്റേഷൻ പരിധിയിലാണോ വാഹനമുള്ളത് അവിടത്തെ പട്രോളിം​ഗ് ടീമും ഒപ്പമുണ്ടാകും. ലഹരിമരുന്നുപയോഗം കണ്ടെത്താൻ നിലവിലുള്ള പരിമിതികൾ മറികടക്കുന്നതാണ് പുതിയ സംവിധാനം.