കോട്ടയം. വാടക നൽകി ഇനി പി.എസ്.സിക്ക് ഓൺലൈൻ പരീക്ഷകൾ നടത്തേണ്ട. പുതുതായി നിർമ്മിച്ച ജില്ലാ ഓഫീസിലെ ഓൺലൈൻ പരീക്ഷാ കേന്ദ്രം മൂന്ന് മാസത്തിനകം സജ്ജമാകും. 156 പേർക്ക് ഒരേസമയം ഓൺലൈൻ പരീക്ഷ എഴുതാനുള്ള സൗകര്യമാണ് ഒരുങ്ങുന്നത്.

​ഇരിപ്പിടങ്ങളും കമ്പ്യൂട്ടറുകളും സജ്ജമാക്കാനുള്ള പ്രവർത്തനങ്ങൾ മൂന്നു മാസത്തിനുള്ളിൽ സജ്ജമാകും. മുട്ടമ്പലത്ത് പുതുതായി നിർമിച്ച കെട്ടിടത്തിലെ രണ്ടാം നിലയിലാണ് പരീക്ഷാ കേന്ദ്രം . പരീക്ഷ നിയന്ത്രിക്കാനുള്ള മുറിയും ഇവിടെയുണ്ട്. ജില്ലയിലെ എൻജിനിയറിം​ഗ് കോളേജുകൾക്ക് വാടക നൽകിയാണ് ഇപ്പോൾ ഓൺലൈൻ പരീക്ഷകൾ നടത്തുന്നത്.

1545.61 ചതുരശ്ര മീറ്റർ.

കഴിഞ്ഞ ദിവസം മുഖ്യമന്ത്രി ഉദ്ഘാടനം ചെയ്ത കെട്ടിടത്തിൽ ജില്ലാ ഓഫീസ് മാത്രമാണ് ആദ്യ ഘട്ടത്തിൽ പ്രവർത്തിക്കുക. അണ്ടർ സെക്രട്ടറിമാർക്കുള്ള ഓഫീസും മറ്റ് ഉദ്യോ​ഗസ്ഥരുടെ ക്യാബിനും തയ്യാറായികഴിഞ്ഞു. മുട്ടമ്പലത്ത് നിലവിലെ ഓഫീസിന് പുറകിലായി 1545.61 ചതുരശ്ര മീറ്ററിൽ നാല് നിലകളിലായി നിർമ്മിച്ച കെട്ടിടത്തിൽ ലിഫ്റ്റ്, എല്ലാ നിലകളിലും വാഷ്റൂം തുടങ്ങിയ സൗകര്യങ്ങളുണ്ട്. നിലവിലെ ഓഫീസ് നിലനിറുത്തി പുതിയ ഓഫീസി​ന്റെ പ്രവർത്തനം ആരംഭിക്കും. സർക്കാർ ഏറ്റെടുത്ത സ്ഥലത്താണ് പൊതുമരാമത്ത് വകുപ്പ് പുതിയ കെട്ടിടം നിർമ്മിച്ചത്. പരീക്ഷാ കേന്ദ്രം സജ്ജമാകുന്നതോടെ സ്വന്തമായി ഓൺലൈൻ പരീക്ഷാ കേന്ദ്രമുള്ള ജില്ലകളുടെ കൂട്ടത്തിലേക്ക് കോട്ടയവും കടക്കും. 3.21 കോടി രൂപയാണ് പുതിയ കെട്ടിടത്തി​ന്റെ നിർമ്മാണചെലവ്. ഓഫ് ലൈൻ പരീക്ഷകൾ നടത്താനുള്ള ഒരുക്കങ്ങളും വൈകാതെ പൂർത്തിയാകും.

ജില്ലാ പി.എസ്.സി ഓഫീസർ മനോജ്കുമാർ പിള്ള പറയുന്നു.

"പുതിയ ഓഫീസിലേയ്ക്ക് മാറാനുള്ള പ്രവർത്തനങ്ങൾ നടക്കുകയാണ്. കമ്പ്യൂട്ടറുകളും ചെയറുകളും അടക്കം ആധുനിക സൗകര്യങ്ങളാണ് ഒരുക്കുന്നത്."