കോട്ടയം: താഴത്തങ്ങാടിയിൽ ചാമ്പ്യൻസ് ബോട്ട് ലീഗ് 29ന് നടക്കും. മത്സരവള്ളംകളിയിൽ ഒമ്പത് ചുണ്ടൻ വള്ളങ്ങൾ മാറ്റുരയ്ക്കും. ചാമ്പ്യൻസ് ബോട്ട് ലീഗും ഗെയിൽ കോട്ടയം മത്സര വള്ളംകളിയും ഒരുമിച്ചാണ് നടക്കുന്നത്. കാട്ടിൽ തെക്കേതിൽ (പള്ളാത്തുരുത്തി ബോട്ട് ക്ലബ്), നടുഭാഗം (എൻ.സി.ഡി.സി. കൈപ്പുഴമുട്ട്), വീയപുരം (പുന്നമട ബോട്ട് ക്ലബ്, ആലപ്പുഴ), ചമ്പക്കുളം (പൊലീസ് ബോട്ട് ക്ലബ്), ചെറുതന(യു.ബി.സി. കൈനകരി), പായിപ്പാടൻ (വേമ്പനാട് ബോട്ട് ക്ലബ്, കുമരകം), സെന്റ് പയസ് ടെൻത് (ടൗൺ ബോട്ട് ക്ലബ് കുമരകം), ആയാപറമ്പ് പാണ്ടി ( കുമരകം ബോട്ട് ക്ലബ്), ദേവാസ് (വില്ലേജ് ബോട്ട് ക്ലബ്, എടത്വ ) എന്നിവയാണ് മത്സരത്തിൽ പങ്കെടുക്കുന്ന ചുണ്ടൻ വള്ളങ്ങൾ. ചെറുവള്ളങ്ങളിൽ വെപ്പ് എ ഗ്രേഡ് വിഭാഗം, വെപ്പ് ബി ഗ്രേഡ് വിഭാഗം,ഇരുട്ടുകുത്തി ബി ഗ്രേഡ് വിഭാഗം, ചുരുളൻ വിഭാഗം എന്നിവയും മത്സരിക്കും.

വെസ്റ്റ് പൊലീസ് സി.ഐ അനൂപ് കൃഷ്ണ ട്രാക്ക് ആൻഡ് ഹിറ്റ്‌സ് നിർണയം ഉദ്ഘാടനം ചെയ്തു. വെസ്റ്റ് ക്ലബ് പ്രസിഡന്റ് ലിയോ മാത്യു അദ്ധ്യക്ഷത വഹിച്ചു. ടൂറിസം വകുപ്പ്, കോട്ടയം വെസ്റ്റ് ക്ലബ് എന്നിവരുടെ നേതൃത്വത്തിൽ കോട്ടയം നഗരസഭ, തിരുവാർപ്പ് ഗ്രാമപഞ്ചായത്ത് എന്നിവരുടെ സഹകരണത്തോടെയാണ് മത്സരം. ഫോൺ: 9605323272, 9447052184.