കുമരകം: ബോട്ട് കാത്തു നിന്നയാൾ ബൈക്കുമായി കായലിൽ വീണു. മുഹമ്മ ബോട്ട് ജെട്ടിയിൽ പാതിരപ്പള്ളി പെരിയംവെളി വീട്ടിൽ ജിൽബർട്ട് മാത്യു (50) ആണ് അപകടത്തിൽപ്പെട്ടത്. മുഹമ്മ സ്റ്റേഷനിലെ ജീവനക്കാരുടെ അവസരോചിതമായ ഇടപെടൽ മൂലം ദുരന്തം ഒഴിവായി. ഇന്നലെ ഉച്ചയ്ക്ക് 2 മണിയ്ക്ക് മുഹമ്മയിൽ നിന്ന് കുമരകത്തേയ്ക്ക് സർവീസ് നടത്തുന്ന ബോട്ടിൽ ബൈക്കുമായി കയറുന്നതിനായി ജെട്ടിയുടെ വലതുവശത്തായി ബൈക്ക് നിറുത്തവെ ബാലൻസ് തെറ്റി കായലിൽ വീഴുകയായിരുന്നു. സ്ഥലത്തുണ്ടായിരുന്ന ജീവനക്കാർ ഉടനടി വെളളത്തിലിറങ്ങി ജിൽബർട്ടിനെ കരക്കെത്തിച്ചു. പിറകെ ബൈക്കും വടംകെട്ടി കരയ്ക്ക് കയറ്റി. കോട്ടയം എം എം പബ്ലിക്കേഷൻസിലെ പ്രൊഡക്ഷൻ മാനേജരാണ് ജീൽബർട്ട് . മുഹമ്മ സ്റ്റേഷൻ മാസ്റ്റർ ഷാനവാസ് ഖാൻ, ഡ്രൈവർ ഇ അനസ്, ലാസ്‌കർ കലേഷൻ, മാസ്റ്റർ എസ് സുബാബു, സ്രാങ്ക് എൻ പി മനോജ്‌, ലാസ്‌കർ സുരേഷ് പി, പൊന്നപ്പൻ എന്നിവരാണ് രക്ഷകരായത്. രക്ഷാപ്രവർത്തകരെ യാത്രക്കാരും നാട്ടുകാരും അഭിനന്ദിച്ചു.