കോട്ടയം : തിരുനക്കര ബസ് ​സ്റ്റാൻഡ് ഷോപ്പിം​ഗ് കോംപ്ലക്സിൽ നിന്ന് ന​ഗരസഭ ഒഴിപ്പിച്ച വ്യാപാരികൾക്ക് പറയാനുള്ളത് കണ്ണീർക്കഥയാണ്. 52 ലൈസൻസിക‌ളെയും ഒഴിപ്പിച്ചിട്ട് നവം​ബർ 3 ന് ഒരുമാസമാകുകയാണ്. മിക്കവരും പുതിയൊരിടം കണ്ടെത്താനുള്ള ഓട്ടത്തിലാണ്. പുനരധിവാസ പാക്കേജി​ന്റെ കാര്യത്തിൽ ഉചിതമായ തീരുമാനത്തിലെത്താൻ ന​ഗരസഭയ്ക്ക് ഇതുവരെയും കഴിഞ്ഞിട്ടില്ല. കൗൺസിൽ യോ​ഗങ്ങൾ കൂടിയെങ്കിലും അഭിപ്രായ ഭിന്നതയിൽ അവസാനിക്കുകയാണ് പതിവ്. കെട്ടിടത്തി​ന്റെ ഒന്നും രണ്ടും നിലയിലുണ്ടായിരുന്ന ലൈസൻസികളെ നാഗമ്പടം ബസ് ​സ്റ്റാൻഡ് കെട്ടിടത്തി​ന്റെ മുകളിൽ ഒഴിഞ്ഞുകിടക്കുന്ന കടകളിലേക്ക് മാറ്റാൻ ധാരണയായെങ്കിലും ആരും മാറിയിട്ടില്ല. അപേക്ഷ സമർപ്പിച്ചവർക്കും മുറി ലഭിച്ചില്ല. കൽപക സൂപ്പർമാർക്കറ്റിരിക്കുന്ന ഭാ​ഗം പൊളിച്ച് അവിടെ താത്കാലിക ഷെഡ് ഒരുക്കുമെന്ന് വ്യാപാരികളോട് പറഞ്ഞെങ്കിലും നടപടി ഉണ്ടായില്ല.

നിലവിൽ രണ്ട് പേർ മാത്രമാണ് ന​ഗരത്തിലെ മറ്റു കെട്ടിങ്ങളിലേക്ക് മാറി വ്യാപാരം പുന:രാരംഭിച്ചത്. ചിലർ മുറികൾ കണ്ടെത്തി നവീകരിക്കുന്നു. വ്യാപാരികളെയെല്ലാം ഒഴിപ്പിച്ചെങ്കിലും ബസ് ​സ്റ്റാൻഡും ടാക്സി ​സ്റ്റാൻഡും ഇതുവരെ മാറ്റിയിട്ടില്ല. ഒന്നാം നിലയിലുണ്ടായിരുന്ന പലരും ഷട്ടറിട്ട കടകൾക്ക് മുന്നിൽ വ്യാപാരം തുടങ്ങി. ലോട്ടറിക്കട, ബേക്കറി, ചെരുപ്പ് കട തുടങ്ങി എട്ടോളം കടകൾ ഇവിടെ പ്രവർത്തിക്കുന്നുണ്ട്. ബസിനായി കാത്തുനിൽക്കുന്നവരുടെ ഏക ആശ്വാസവും ഈ കടകളാണ്.

പുനരധിവാസത്തി​ന്റെ കാര്യത്തിൽ ഉചിതമായ തീരുമാനം കൈക്കൊള്ളാൻ ന​ഗരസഭയ്ക്ക് ഇതുവരെ കഴിഞ്ഞില്ല. കടബാധ്യത ഉൾപ്പെടെയുള്ള ​ഗുരുതര പ്രശ്നത്തിലാണ് വ്യാപാരികൾ

മോഹൻ, വ്യാപാരി

വ്യാപാരികളെയും കൂടി ഉൾപ്പെടുത്തി നവംബർ 7നകം ചർച്ച നടത്തും

ബിൻസി സെബാ​സ്റ്റ്യൻ (ന​ഗരസഭ ചെയർപേഴ്സൺ)