കോഴിക്കോട്: ബാലുശേരി എം എൽ എ സച്ചിൻ ദേവിന്റെ കാർ അപകടത്തിൽപ്പെട്ടു. ഇന്ന് രാവിലെയുണ്ടായ അപകടത്തിൽ കാറുമായി കൂട്ടിമുട്ടിയ സ്കൂട്ടറിൽ സഞ്ചരിച്ചിരുന്ന പിതാവിനും മകൾക്കും പരിക്കേറ്റു. അപകടത്തിൽ പരിക്കേറ്റ താനൂർ മൂസാന്റെ പുരക്കൽ ആബിത്ത് (42), ഇയാളുടെ മകൾ പതിനൊന്നുകാരിയായ ഫമിത ഫർഹ എന്നിവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

അപകടം നടക്കുമ്പോൾ എം എൽ എ കാറിനുള്ളിലുണ്ടായിരുന്നില്ല. എം എൽ എയെ കൂട്ടാനായി ഡ്രൈവർ വീട്ടിലേയ്ക്ക് പോകുന്നതിന് ഇടയിൽ മലാപ്പറമ്പ് ബൈപാസിൽ വെച്ചായിരുന്നു അപകടമുണ്ടായത്. പറമ്പിൽ കടവ് മഖാമിൽ സിയാറത്തിനായി പോകുകന്നതിനിടയിലായിരുന്നു ആബിത്തും മകളും സഞ്ചരിച്ച സ്കൂട്ടർ കാറുമായി കൂട്ടിയിടിച്ചത്. അപകടത്തെ തുടർന്ന് കാറിനടിയിലേയ്ക്ക് ഇരുവരും തെറിച്ചുവീഴുകയായിരുന്നു. ഇടതുകൈയ്ക്ക് പരിക്കേറ്റ ആബിത്തിനെയും ഇടതുകാലിന് പരിക്കേറ്റ ഫമിതയെയും സച്ചിൻ ദേവ് എം എൽ എ ആശുപത്രിയിൽ സന്ദർശിച്ചു.