വനപ്രദേശങ്ങൾക്ക് ഇടയിലൂടയുള്ള റോഡിലൂടെ വാഹനങ്ങളോടിക്കുന്നത് എപ്പോഴും വളരെയധികം ശ്രദ്ധയോടെ ആയിരിക്കണം. കാരണം ആനയും പുലിയും കാട്ടുപോത്തുമടക്കമുള്ള വന്യമൃഗങ്ങൾ ചിലപ്പോൾ തികച്ചും അപ്രതീക്ഷിതമായി ആയിരിക്കും റോഡിലേയ്ക്ക് കടന്നു വരുന്നത്. അത് കൊണ്ട് തന്നെ ഇത്തരം പ്രദേശങ്ങളിലൂടെ യാത്ര ചെയ്യുമ്പോൾ അതീവ ശ്രദ്ധയോടെ മിതമായ വേഗതയിൽ ഡ്രൈവ് ചെയ്തില്ലെങ്കിൽ വംശനാശ ഭീഷണി നേരിടുന്ന മൃഗങ്ങൾ വരെ വാഹനവുമായി കൂട്ടിമുട്ടിയേക്കാം.
ഇത്തരത്തിൽ റോഡ് മുറിച്ചു കടക്കുന്നതിനിടയിൽ വന്യമൃഗങ്ങൾ അപകടത്തിൽപ്പെടുന്നതും ആനകൾ അടക്കം കൂട്ടത്തോടെ റോഡിലൂടെ സഞ്ചരിക്കുമ്പോൾ വാഹനങ്ങൾ വരി വരിയായി നിർത്തി ഇട്ടിരിക്കുന്നതുമായ വീഡിയോകൾ സോഷ്യൽ മീഡിയയിൽ നിരവധിയായുണ്ട്. അത്തരത്തിൽ ഒരു വന്യമൃഗം റോഡ് മുറിച്ചുകടക്കാൻ ശ്രമിക്കുന്ന വീഡിയോ ദൃശ്യം അസം മുഖ്യമന്ത്രി ഇന്നലെ ട്വിറ്ററിലൂടെ പങ്കുവെച്ചിരുന്നു.അസം മുഖ്യമന്ത്രി ഹിമന്ത ബിശ്വ ശർമ്മ പങ്കുവെച്ച വീഡിയോയിലെ നായകൻ ഒരു കാണ്ടാമൃഗമാണ്. റോഡ് മുറിച്ചുകടക്കുന്നതിനിടയിൽ ഒരു ട്രക്കുമായി കൂട്ടിയിയിടിച്ചെങ്കിലും ഒന്നും സംഭവിക്കാത്ത ലാഘവത്തോടെ നടന്നകലുന്ന കാണ്ടാമൃ‌ഗത്തിന്റെ കരുത്ത് കണ്ട് അമ്പരന്നിരിക്കുകയാണ് സോഷ്യൽ മീഡിയ.
അസമിലെ ധുബ്രി ജില്ലയിലെ ഹൽദി ബാരിയിൽ നടന്ന സംഭവത്തിൽ ഒരു കാണ്ടാമൃഗം വാഹനങ്ങളുള്ള റോഡിന് മറുഭാ‌ഗത്തേയ്ക്ക് കടക്കാൻ ശ്രമിക്കുന്നത് കാണാം. നിർഭാഗ്യവശാൽ അതു വഴി വരുന്ന ട്രക്കിന്റെ ഡ്രൈവർ കാണ്ടാമൃഗത്തിനെ ശ്രദ്ധിക്കുന്നില്ല. നിമിഷങ്ങൾക്കകം തന്നെ കാണ്ടാമൃഗം ട്രക്കുമായി കൂട്ടിമുട്ടി റോഡിലേയ്ക്ക് തന്നെ വീഴുന്നത് വീഡിയോയിൽ വ്യക്തമാണ്. അവിടെ നിന്നും എഴുന്നറ്റെങ്കിലും വീണ്ടും താഴെ വീഴുന്ന കാണ്ടാമൃഗം ഒടുവിൽ റോഡ് മുറിച്ചുകടക്കാനുള്ള ശ്രമം ഉപേക്ഷിച്ച് തിരികെ പോകുന്നുണ്ട്.
Rhinos are our special friends; we’ll not allow any infringement on their space.
— Himanta Biswa Sarma (@himantabiswa) October 9, 2022
In this unfortunate incident at Haldibari the Rhino survived; vehicle intercepted & fined. Meanwhile in our resolve to save animals at Kaziranga we’re working on a special 32-km elevated corridor. pic.twitter.com/z2aOPKgHsx
വീഡിയോയിൽ തിരികെ വനത്തിലേയ്ക്ക് തന്നെ മടങ്ങുന്നത് കാണാമെങ്കിലും അപകടത്തിൽ കാണ്ടാമൃഗത്തിന് ആന്തരികമായി പരിക്ക് പറ്റിയിട്ടുണ്ടോ അതിന് ശേഷം എന്തെങ്കിലും സംഭവിച്ചിട്ടുണ്ടാകുമോ എന്നുള്ള ആശങ്ക വീഡിയോ കണ്ട പലരും പങ്കുവെച്ചു. കാണ്ടാമൃഗത്തിനെ ഇടിച്ചിട്ട വാഹനത്തെ തിരിച്ചറിഞ്ഞ് ഫൈൻ ചുമത്തിയിട്ടുണ്ടന്നും ഇത്തരം അപകടങ്ങൾ ഒഴിവാക്കാൻ 32 കിലോ മീറ്റർ നീളത്തിൽ പ്രത്യേക ഇ‌ടനാഴി നിർമിക്കുമെന്നും അസം മുഖ്യമന്ത്രി ട്വീറ്റിൽ കുറിച്ചിട്ടുണ്ട്.