തിരുവനന്തപുരം: സംസ്ഥാനത്ത് ഇന്ന് ശക്തമായ മഴയ്ക്ക് സാദ്ധ്യതയുള്ളതായി കേന്ദ്ര കാലാവസ്ഥാ വകുപ്പ്. പത്തനംതിട്ട, ഇടുക്കി ജില്ലകളിൽ യെല്ലോ അലർട്ട് പ്രഖ്യാപിച്ചിരിക്കുകയാണ്. അടുത്ത മണിക്കൂറുകളിൽ പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട്

എന്നീ ജില്ലകളിൽ ഒറ്റപ്പെട്ടയിടങ്ങളിൽ മിതമായ മഴയ്ക്കും മറ്റു ജില്ലകളിലെ ഒറ്റപ്പെട്ടയിടങ്ങളിൽ നേരിയ മഴയ്ക്കും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചതായി സംസ്ഥാന ദുരന്ത നിവാരണ വകുപ്പ് മുന്നറിയിപ്പ് നൽകി.

മലയോര മേഖലകളിൽ കൂടുതൽ മഴയ്ക്ക് സാദ്ധ്യതയെന്ന് റിപ്പോർട്ടിൽ പറയുന്നു. കഴിഞ്ഞ ദിവസം വൈകിട്ടോടെ തലസ്ഥാന നഗരിയിൽ ശക്തമായ മഴ ലഭിച്ചിരുന്നു. ഇടവിട്ട് പെയ്ത മഴയിൽ പലയിടങ്ങളിലും നേരിയതോതിൽ വെള്ളക്കെട്ടുണ്ടായി. തമ്പാനൂർ, എസ് എസ് കോവിൽ റോഡ് തുടങ്ങിയ താഴ്ന്ന പ്രദേശങ്ങളിലാണ് വെള്ളം കയറിയത്. കൊല്ലം ജില്ലയിലെ ചില പ്രദേശങ്ങളിലും ശക്തമായ മഴ ലഭിച്ചിരുന്നു.

കോമോറിൻ തീരത്തായുള്ള ചക്രവാതച്ചുഴിയും മദ്ധ്യ- ബാംഗാൾ ഉൾക്കടലിലെ ചക്രവാതച്ചുഴിയുമാണ് മഴയ്ക്ക് കാരണം. മഴ ശക്തമായ സാഹചര്യങ്ങളിൽ കൃത്യമായ ജാഗ്രതാ നിർദേശങ്ങൾ പാലിക്കണമെന്ന് അധികൃതർ നിർദേശിക്കുന്നു.