നടൻ സലിം കുമാറുമൊത്ത് വിദേശരാജ്യങ്ങളിൽ ഷോ അവതരിപ്പിച്ചതിന്റെ വിശേഷങ്ങൾ പങ്കുവയ്ക്കുകയാണ് ഗായകൻ ജി വേണുഗോപാൽ. സലിം കുമാർ സിനിമയിൽ അഭിനയിക്കാൻ തുടങ്ങിയ കാലത്ത് 'മമ്മൂട്ടി ഷോ'യുടെ ഭാഗമായി യുഎസിലും യുകെയിലും ഒന്നിച്ചുണ്ടായിരുന്നതിന്റെ അനുഭവങ്ങളാണ് അദ്ദേഹം ഫേസ്ബുക്കിൽ കുറിച്ചത്.
'വേറിട്ടൊരു വ്യക്തിത്വത്തിനുടമയാണ് സലിം. ഹോട്ടൽ മുറിയിലെത്തിയാൽ ആദ്യം കട്ടിലിൽ ഒരു കസേര വലിച്ചിട്ട് അതിൽ കയറി, ടോയ്‌ലറ്റിൽ നിന്നുള്ള ടിഷ്യൂ പേപ്പർ സ്മോക് അലാമിൽ തിരുകിക്കയറ്റും. എന്നിട്ട് ചിമ്മിനിയിൽ നിന്നെന്ന പോലെ നിർത്താതെ പുകയ്ക്കും. അമേരിക്കയിൽ പുക വലിക്കാൻ പാടില്ലെന്ന നിർദേശമുള്ളതിനാൽ ഞങ്ങളുടെ സ്പോൺസർ വിജയേട്ടന് പല തവണ ഫൈൻ കെട്ടേണ്ടി വന്നിട്ടുണ്ട്. ഞങ്ങൾ തമാശയായി സലിമിനോട് പറഞ്ഞിട്ടുണ്ട്, നിന്റെ പ്രതിഫലത്തെക്കാൾ നിനക്ക് ഫൈൻ തുകയാകുമല്ലോ എന്ന്. തിരിച്ച് വരാൻ നേരത്ത് എന്റെ പോക്കറ്റിലുണ്ടായിരുന്ന പഴ്സ് ഞാൻ സലിമിന് കൊടുത്തു. ഇതിൽ നിറയെ കാശ് വരട്ടെ എന്ന് ആശംസിച്ചു. തൊട്ടടുത്ത വർഷം മുതൽ സലിമിന് തിരിഞ്ഞ് നോക്കേണ്ടി വന്നിട്ടില്ല.'- ജി വേണുഗോപാൽ കുറിച്ചു.
ഫേസ്ബുക്ക് പോസ്റ്റിന്റെ പൂർണരൂപം:
1999 ലായിരുന്നു " മമ്മൂട്ടി ഷോ '', യു.എസ്. എ യിലും യു.കെ യിലും. അന്ന് വലിയൊരു ഗ്രൂപ്പിൻ്റെ ഭാഗമായി പോയ ഓർമ്മകൾ ! കോമഡി, മിമിക്രി വിഭാഗത്തിൽ പുതിയൊരാൾ അന്ന് കൂടെ വന്നു. സലിം കുമാർ. സിനിമയിൽ അപ്രസക്തമായ ഒന്ന് രണ്ട് റോളുകൾ മാത്രമേ സലിം ചെയ്തിട്ടുണ്ടായിരുന്നുള്ളൂ. ഭാഷാ പരിജ്ഞാനവും, നേരിനോടുള്ള കൂറും ആർജ്ജവവും , ജീവിതത്തിലെന്തും നർമ്മത്തിലൂടെ കാണാനുള്ള കഴിവും, സലിമിന് വേറിട്ടൊരു വ്യക്തിത്വം നൽകിയിരുന്നു. ഹോട്ടൽ മുറികളിലെത്തിയാൽ സലിം ആദ്യം ചെയ്യുന്നത്, കട്ടിലിൽ ഒരു കസേര വലിച്ചിട്ട്, അതിൽ കയറി, ടോയ്‌ലറ്റിൽ നിന്നുള്ള ടിഷ്യു പേപ്പർ സ്മോക് അലാമിൽ തിരുകിക്കയറ്റും. എന്നിട്ട് ഒരു ചിമ്മിനിയിൽ നിന്നെന്നപോലെ നിർത്താതെ പുകയൂതും. അമേരിക്കയിലെ മിക്ക ആഡിറ്റോറിയമുകളിലും കർശനമായ "no smoking" നിർദ്ദേശമുണ്ട്. ന്യൂയോർക്കിലെ പ്രശസ്തമായ "Colden Centre" ഇൽ ഉൾപ്പെടെ ഞങ്ങളുടെ സ്പോൺസർ വിജയേട്ടന് ഫൈൻ കെട്ടേണ്ടി വന്നിട്ടുണ്ട്. അവസാനം ഞങ്ങൾ സലിമിനോട് തമാശിച്ചു ,നിൻ്റെ പ്രതിഫലത്തുകയെക്കാൾ നിനക്ക് ഫൈൻ തുകയാകുമല്ലോ എന്ന്. തിരിച്ച് വരാൻ സമയം ഞാൻ എൻ്റെ പോക്കറ്റിലുള്ള പർസ് സലിമിന് കൊടുത്തു. " ഇതിൽ നിറയെ കാശ് വീഴട്ടെ " എന്നാശംസിച്ചു. എന്തായാലും തൊട്ടടുത്ത വർഷം , രണ്ടായിരമാണ്ടിൽ റിലീസ് ചെയ്ത "സത്യമേവജയതേ " എന്ന സിനിമയ്ക്ക് ശേഷം സലിമിന് തിരിഞ്ഞു നോക്കേണ്ടി വന്നിട്ടില്ല. ജീവിതത്തിലെ വേദനാ നിർഭരമായ നിമിഷങ്ങളെയെല്ലാം ചിരി കൊണ്ട് നേരിടുന്ന, പറവൂരിൽ സ്വന്തം വീടായ "Laughing Villa " യിൽ ചിരിച്ചും ചിരിപ്പിച്ചും സസുഖം വാഴുന്ന സലിമിന് നന്മയും, ആയുരാരോഗ്യ സൗഖ്യവും നേരുന്നു. VG.
https://www.facebook.com/SalimKumarOfficialPage