ന്യൂഡൽഹി: പ്രസിദ്ധ ഹിന്ദി സീരിയൽ താപം വൈശാലി ടക്കറിനെ വീട്ടിനുള്ളിൽ മരിച്ച നിലയിൽ കണ്ടെത്തി. മദ്ധ്യപ്രദേശിലെ വീട്ടിലാണ് വൈശാലിയെ മരിച്ച നിലയിൽ കണ്ടെത്തിയത്. 26 വയസായിരുന്നു. മദ്ധ്യപ്രദേശിലെ ഇൻഡോറിൽ ഞായറാഴ്‌ചയാണ് സംഭവം.
മുറിയിൽ നിന്ന് കണ്ടെടുത്ത ആത്മഹത്യാക്കുറിപ്പിൽ മുൻ കാമുകനെതിരെ ഗുരുതര ആരോപണങ്ങൾ ആണുള്ളത്. മുൻ കാമുകൻ തന്നെ ഉപദ്രവിച്ചിരുന്നതായും മാനസിക സമ്മർദ്ദത്തിലായിരുന്നുവെന്നും ആത്മഹത്യാക്കുറിപ്പിലുണ്ട്.
സസുരാൽ സിമർ കാ, യേ രിഷ്താ ക്യാ കെഹലാതാ ഹേ തുടങ്ങിയ പരമ്പരകളിലൂടെ ശ്രദ്ധേയയായ നടിയാണ് വൈശാലി. ബിഗ് ബോസ് താരം നിഷാന്ത് മൽക്കാനി നായകനായ രക്ഷാബന്ധൻ എന്ന പരമ്പരയിലാണ് അവസാനം അഭിനയിച്ചത് ഇൻഡോറിൽ പിതാവിനും സഹോദരനുമൊപ്പമാണ് വൈശാലി താമസിച്ചിരുന്നത്.രാവിലെ മുറിയിൽ നിന്ന് പുറത്തുവരാതിരുന്നതിനെ തുടർന്ന് അന്വേഷിച്ചെത്തിയ പിതാവാണ് തൂങ്ങിമരിച്ച നിലയിൽ ഇവരെ കാണുന്നത്. . സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്‌