മോഹൻലാലിന്റെ പാചക വീഡിയോകൾ നിരവധി തവണ സോഷ്യൽ മീഡിയയിൽ വൈറലായിട്ടുണ്ട്. ഭക്ഷണം പാകം ചെയ്യുന്നത് താൻ ഏറെ ആസ്വദിച്ചുചെയ്യുന്ന കാര്യമാണെന്നും അദ്ദേഹം നേരത്തെ വ്യക്തമാക്കിയിരുന്നു. ഇപ്പോഴിതാ ലാലേട്ടൻ നടനായിരുന്നില്ലെങ്കിൽ ഒരു വിശിഷ്ട പാചക വിദഗ്ദ്ധനാകുമായിരുന്നുവെന്ന് അഭിപ്രായപ്പെട്ടുകൊണ്ട് രംഗത്തെത്തിയിരിക്കുകയാണ് ഷെഫ് പിള്ള.

മോഹൻലാലിന്റെ കൊച്ചിയിലെ വീട്ടിൽ പോയപ്പോഴുണ്ടായ അനുഭവവും ഷെഫ് പിള്ള ഫേസ്ബുക്കിലൂടെ പങ്കുവച്ചിരിക്കുകയാണ് ഇപ്പോൾ. നടന്റെ കൊച്ചിയിലെ വീട്ടിൽ പോയപ്പോൾ അടുക്കള കാണിച്ചുതന്നെന്നും, നാഗവല്ലി സണ്ണിക്ക് ആഭരണങ്ങൾ കാണിച്ചുകൊടുക്കുന്ന ഭാവത്തോടെയായിരുന്നു എല്ലാം വിവരിച്ചുതന്നതെന്നും ഷെഫ് പിള്ള അദ്ദേഹം ഫേസ്ബുക്കിൽ കുറിച്ചു.

ഫേസ്ബുക്ക് പോസ്റ്റിന്റെ പൂർണ്ണരൂപം

ലാലേട്ടന്റെ കൊച്ചിയിലെ പുതിയ വീട്ടിൽ അദ്ദേഹത്തോടൊപ്പം ചിലവഴിച്ച ഒരു വൈകുന്നേരം..! ഞാൻ വാതോരാതെ സിനിമയെക്കുറിച്ചും അദ്ദേഹം ഭക്ഷണത്തെക്കുറിച്ചും സംസാരിച്ച മണിക്കുറുകൾ... നാഗവല്ലി സണ്ണിക്ക് ആഭരണങ്ങൾ വിവരിച്ച് കൊടുക്കുന്ന അതെ ഭാവത്തോടെ അദ്ദേഹത്തിന്റെ അടുക്കളയിലെ Rational Combi Oven, Thermomix, japanese teppanyaki grill എന്നിവ എനിക്ക് കാണിച്ച് തന്നത്... ലാലേട്ടൻ അഭിനേതാവായിരുന്നില്ലങ്കിൽ ഒരുപക്ഷേ ഒരു വിശിഷ്ട പാചക വിദഗ്ദ്ധനാവുമായിരുന്നു എന്ന് അദ്ദേഹത്തിന്റെ ഭക്ഷണ അറിവുകൾ കേൾക്കുബോൾ എനിക്ക് തോന്നി..!! ആട്ടിറച്ചി മല്ലിയില കുറുമയും, ചെമ്മീൻ അച്ചാറും നിറയെ തേങ്ങയിട്ട ഇടിയപ്പവും അദ്ദേഹത്തോടൊപ്പം കഴിച്ചു 🤗😇 Thank you Laletta for the amazing evening!