ദുൽഖർ സൽമാനെ നായകനാക്കി നവാഗതനായ അഭിലാഷ് ജോഷി സംവിധാനം ചെയ്യുന്ന കിംഗ് ഒഫ് കൊത്ത എന്ന ചിത്രത്തിൽ തെന്നിന്ത്യൻ താരം ഷബീർ കല്ലറക്കൽ പ്രധാന വേഷത്തിൽ എത്തുന്നു. ചെന്നൈ മലയാളിയായ ഷബീർ ആദ്യമായാണ് മലയാളത്തിൽ അഭിനയിക്കുന്നത്. പാ രഞ്ജിത് സംവിധാനം ചെയ്ത സാർപട്ടാ പരമ്പരൈയിൽ നായകനും വില്ലനും അല്ലാതിരുന്നിട്ടും പ്രേക്ഷകരുടെ ഇഷ്ടം നേടിയിരുന്നു ഷബീർ അവതരിപ്പിച്ച ഡാൻസിങ് റോസ് എന്ന വിസ് മയം.2004 ൽ എത്തിയ ആയുധമെഴുത്താണ് ആദ്യ ചിത്രം . നുറുങ്കിവാ മുത്തമിടാതെ എന്ന ചിത്രത്തിൽ നായകനായി അരങ്ങേറ്റം കുറിച്ചു. ചെമ്പൻ വിനോദ് ജോസ് , ഗോകുൽ സുരേഷ്, എെശ്വര്യ ലക്ഷമി, നൈല ഉഷ, ശാന്തി കൃഷ്ണ തുടങ്ങിയവരാണ് കിംഗ് ഒഫ് കൊത്തയിലെ മറ്റ് താരങ്ങൾ.

ആക്ഷൻ ത്രില്ലർ ഗണത്തിൽപ്പെട്ട ചിത്രം രണ്ട് കാലഘട്ടങ്ങളിലൂടെയാണ് കടന്നുപോവുന്നത്. ജോഷി സംവിധാനം ചെയ്ത പൊറിഞ്ചു മറിയ ജോസിന് രചന നിർവഹിച്ച അഭിലാഷ് എൻ. ചന്ദ്രൻ ആണ് മാസ് എന്റർടെയ്‌നറായി ഒരുങ്ങുന്ന കിംഗ് ഒഫ് കൊത്തയുടെ രചയിതാവ്. നിമിഷ് രവി ഛായാഗ്രഹണം നിർവഹിക്കുന്നു. വേഫെറർ ഫിലിംസിന്റെ ബാനറിൽ ദുൽഖർ സൽമാനാണ് കിംഗ് ഒഫ് കൊത്ത നിർമ്മിക്കുന്നത്. സംവിധായകൻ ജോഷിയുടെ മകനാണ് അഭിലാഷ് ജോഷി. ജോഷി സംവിധാനം ചെയ്ത പാപ്പനിൽ ക്രിയേറ്റീവ് ഡയറക്ടർ പ്രവർത്തിച്ചിട്ടുണ്ട്.