മാഡ്രിഡ് : സ്പാനിഷ് ലാ ലിഗ ഫുട്ബാളിൽ റയൽ മാഡ്രിഡിന്റെ കുതിപ്പ് തുടരുന്നു. കഴിഞ്ഞ രാത്രി നടന്ന മത്സരത്തിൽ ഒന്നിനെതിരെ മൂന്നുഗോളുകൾക്ക് സെവിയ്യയെ കീഴടക്കിയ റയലിന് പോയിന്റ് പട്ടികയിൽ രണ്ടാമതുള്ള ബാഴ്സലോണയുമായി ആറുപോയിന്റ് വ്യത്യാസത്തിൽ ലീഡ് ചെയ്യുന്നു.

സ്വന്തം തട്ടകമായ സാന്റിയാഗോ ബെർണബ്യൂവിൽ നടന്ന മത്സരത്തിൽ ലൂക്കാ മൊഡ്രിച്ച്,ലൂക്കാസ് വസ്ക്വേസ്,ഫ്രെഡറിക്കോ വൽവെർദേ എന്നിവർ നേടിയ ഗോളുകൾക്കാണ് റയൽ വിജയിച്ചത്. അഞ്ചാം മിനിട്ടിലാണ് മൊഡ്രിച്ച് സ്കോർ ചെയ്തത്. 54-ാം മിനിട്ടിൽ എറിക് ലമേലയിലൂടെ സെവിയ്യ സമനില പിടിച്ചെങ്കിലും 79-ാം മിനിട്ടിലെ വസ്ക്വേസിന്റെ ഗോൾ റയലിന് ലീഡ് നൽകി.81-ാം മിനിട്ടിലായിരുന്നു വൽവെർദേയുടെ ഗോൾ.

ഈ വിജയത്തോടെ റയലിന് 11 മത്സരങ്ങളിൽ നിന്ന് 31 പോയിന്റായി. രണ്ടാം സ്ഥാനത്തുള്ള ബാഴ്സലോണയ്ക്ക് 10 മത്സരങ്ങളിൽ നിന്ന് 25 പോയിന്റാണുള്ളത്.