തിരുവനന്തപുരം : കൃഷി വകുപ്പ് മന്ത്രിയും കൃഷിവകുപ്പിലെ സംസ്ഥാനതല ഉദ്യോഗസ്ഥരും സംസ്ഥാനത്തെ കാർഷിക ബ്ലോക്കുകൾ കേന്ദ്രീകരിച്ച് കർഷകരോട് സംവദിച്ച് അവരുടെ പ്രശ്നങ്ങൾ നേരിട്ട് മനസ്സിലാക്കുകയും പരിഹാരം കാണുകയും ചെയ്യുന്ന കൃഷിദർശൻ പദ്ധതിക്ക് നാളെ തുടക്കം കുറിക്കുമെന്ന് മന്ത്രി പി പ്രസാദ് അറിയിച്ചു. തൃശ്ശൂർ ജില്ലയിലെ ഒല്ലൂക്കര ബ്ലോക്കിലാണ് ഒക്ടോബർ 25 മുതൽ 29 വരെ സംസ്ഥാനത്തെ ആദ്യ കൃഷിദർശൻ സംഘടിപ്പിച്ചിട്ടുള്ളത്.

പി. ബാലചന്ദ്രൻ എം.എൽ.എയുടെ അദ്ധ്യക്ഷതയിൽ മന്ത്രി കെ രാജൻ മണ്ണുത്തി വെറ്ററിനറി സർവകലാശാല ഗ്രൗണ്ടിൽ കാർഷിക പ്രദർശനം ഉദ്ഘാടനം ചെയ്ത് കൊണ്ട് കൃഷിദർശൻ ആരംഭിക്കും. തൃശൂർ മേയർ എം.കെ. വർഗീസ്, ഒല്ലൂക്കര ബ്ലോക്ക് പ്രസിഡന്റ് കെ ആർ രവി എന്നിവർ പങ്കെടുക്കും. അഞ്ച് ദിവസങ്ങളിലായി നടത്തുന്ന കാർഷിക പ്രദർശനത്തിൽ കാർഷിക സർവകലാശാല ഉൾപ്പെടെ വിവിധ ഗവേഷണ കേന്ദ്രങ്ങൾ, പൊതുമേഖലാ സ്ഥാപനങ്ങൾ, സർക്കാർ സ്ഥാപനങ്ങൾ എന്നിവയുടെ സ്റ്റാളുകൾ ഉണ്ടായിരിക്കും.

27 ന് കൃഷിവകുപ്പ്, മണ്ണ് സംരക്ഷണ-മണ്ണുപര്യവേക്ഷണ വകുപ്പ് ഉദ്യോഗസ്ഥർ, കാർഷിക സർവ്വകലാശാല ശാസ്ത്രജ്ഞർ, വിദ്യാർത്ഥികൾ എന്നിവരടങ്ങുന്ന സംഘം 5 ടീമുകളായി തിരിഞ്ഞ് ഓരോ പഞ്ചായത്തിലെയും കൃഷിയിടങ്ങൾ സന്ദർശിക്കും. സന്ദർശന റിപ്പോർട്ടിന്റെ അടിസ്ഥാനത്തിൽ 28 ന് കൃഷിമന്ത്രിയുടെ നേതൃത്വത്തിലുള്ള ഒരു ഉന്നതതല സംഘം കർഷകരുടെ കൃഷിയിടങ്ങൾ സന്ദർശിക്കും.

സായാഹ്നങ്ങളിൽ കൃഷിമന്ത്രി പങ്കെടുക്കുന്ന ഭവന കൂട്ടായ്മയും സാംസ്കാരിക പരിപാടികളും ഉണ്ടാകും. 29ന് രാവിലെ കൃഷിദർശന്റെ ഭാഗമായുള്ള യോഗത്തിൽ തദ്ദേശ സ്വയംഭരണ സ്ഥാപന മേധാവികളും വകുപ്പ് മേധാവികളുമായി കൃഷിമന്ത്രി കൂടിക്കാഴ്ച നടത്തും. ഒല്ലൂക്കര ബ്ലോക്കിന്റെ അടുത്ത നാല് വർഷത്തേക്കുള്ള വിഷൻ ഓല്ലൂക്കര 2026 അവതരിപ്പിക്കും. വിവിധ വകുപ്പുകളുമായി കാർഷിക പദ്ധതികളുടെ ഏകോപനം, മൂല്യവർദ്ധിത കൃഷി സാധ്യതകൾ എന്നിവ യോഗത്തിൽ വിശദമായി അവലോകനം ചെയ്യും. 29 ന് രാവിലെ 11 മണിക്ക് കൃഷി വകുപ്പ് മന്ത്രി നേരിട്ട് ജില്ലയിലെ കർഷകരുടെ പ്രശ്നങ്ങൾ കേട്ട് പരിഹാരമാർഗ്ഗങ്ങൾ കൈക്കൊള്ളുന്ന കർഷക അദാലത്ത് നടക്കും. വൈകുന്നേരം 3 30ന് ഞങ്ങളും കൃഷിയിലേക്ക് പദ്ധതിയുടെ ഭാഗമായി രൂപീകരിക്കപ്പെട്ട കൃഷികൂട്ടങ്ങളുടെ സംഗമം നടക്കും. ഘോഷയാത്രയെ തുടർന്ന് നടക്കുന്ന പൊതുസമ്മേളനം മന്ത്രി കെ രാജന്റെ അധ്യക്ഷതയിൽ മന്ത്രി പി പ്രസാദ് ഉദ്ഘാടനം ചെയ്യും. മന്ത്രി കെ രാധാകൃഷ്ണൻ, മന്ത്രി ഡോ.ആർ. ബിന്ദു, ടി.എൻ പ്രതാപൻ എം.പി, ജില്ലയിലെ എം.എൽ.എമാർ, മേയർ, ജില്ലാ പഞ്ചായത്ത് പ്രസിഡന്റ്, ബ്ലോക്ക് പഞ്ചായത്ത് പ്രസിഡന്റ്, ബ്ലോക്കിലെ ഗ്രാമ പഞ്ചായത്ത് പ്രസിഡന്റുമാർ , മറ്റ് ജനപ്രതിനിധികൾ, രാഷ്ട്രീയ പാർട്ടി നേതാക്കൾ തുടങ്ങിയവർ പങ്കെടുക്കും. ബ്ലോക്കിലെ മാതൃക ഹരിത പോഷക ഗ്രാമ പ്രഖ്യാപനവും ബ്ലോക്കിലെ സ്മാർട്ട് കൃഷിഭവൻ പ്രഖ്യാപനവും ഇതോടൊപ്പം നടക്കും.