കൊൽക്കത്ത: ബിരിയാണിയിലെ മസാലകൾ പുരുഷൻമാരിൽ ലൈംഗിക ഉത്തേജനം കുറയ്ക്കുമെന്ന് ചൂണ്ടിക്കാട്ടി കടകൾ അടപ്പിച്ച് ത്രിണമൂൽ കോൺഗ്രസ് നേതാവ്. ബംഗാളിലെ കോച്ച് ബെഹാറിലെ ബിരിയാണി കടകളാണ് അടപ്പിച്ചത്.

ബിരിയാണിയിൽ ഉപയോഗിക്കുന്ന ഭക്ഷ്യവസ്തുക്കളും മസാലകളും പുരുഷൻമാരിൽ ലൈംഗിക ഉത്തേജനം കുറയ്ക്കുന്നതായി നിരവധി ആരോപണങ്ങൾ ഉയർന്നുവെന്ന് മമത ബാനർജി സർക്കാരിലെ മുൻ മന്ത്രിയും ത്രിണമൂൽ നേതാവുമായ രബീന്ദ്ര നാഥ് ഘോഷാണ് പറഞ്ഞത്.

അതേസമയം, കച്ചവടത്തിനുള്ള ലൈസൻസ് ഇല്ലാത്തതിനാലാണ് കടകൾ അടപ്പിച്ചതെന്ന് കോച്ച് ബെഹാർ മുനിസിപ്പാലിറ്റി ചെയർമാൻ പറഞ്ഞു. ഉത്തർപ്രദേശിൽ നിന്നും ബീഹാറിൽ നിന്നുമുള്ള നിരവധി പേർ പ്രദേശത്ത് ബിരിയാണി വിൽക്കുന്നുണ്ടെന്നും ലൈസൻസ് ഇല്ലാതെയാണ് ഇത്തരം കടകൾ പ്രവർത്തിക്കുന്നതെന്നും അദ്ദേഹം വ്യക്തമാക്കി.