തിരുവനന്തപുരം: ബവ്കോ പ്രീമിയം കൗണ്ടറുകളിൽ മോഷണം. രണ്ടുമാസത്തിനിടെ വിവിധ ഔട്ട്‌ലെറ്റുകളിൽ നിന്നായി 42,868 രൂപയുടെ മദ്യമാണ് മോഷ്ടിക്കപ്പെട്ടത്. 36 കേസുകളാണ് രജിസ്റ്റർ ചെയ്തത്. ജവാനും ബെക്കാർഡിയുമാണ് കൂടുതലും മോഷണം പോയത്. സംഭവത്തിൽ ബെവ്കോ പരാതി നൽകുന്നതിന് പകരം അതത് ഔട്ട്ലെറ്റുകളാണ് കേസുമായി മുന്നോട്ട് പോകുന്നത്.

മോഷ്ടാക്കളുടെ സിസിടിവി ദൃശ്യങ്ങൾ ഉൾപ്പെടെയാണ് പല ഔട്ട്ലെറ്റുകളും പരാതി നൽകിയിരിക്കുന്നത്. ചേർത്തല ഔട്ട്ലെറ്റിൽ നിന്ന് മാത്രമായി 8900 രൂപയുടെ മദ്യമാണ് മോഷണം പോയത്. വനിതാ ജീവനക്കാരുള്ള ഔട്ട്ലെറ്റുകളിൽ പോലും മതിയായ സുരക്ഷാ സംവിധാനങ്ങളില്ല. ഇതാണ് മോഷ്ടാക്കൾ മുതലെടുക്കുന്നത്. ഔട്ട്ലെറ്റുകൾക്ക് മുന്നിലെ നീണ്ട ക്യൂ ഒഴിവാക്കാനാണ് പ്രീമിയം കൗണ്ടറുകൾ ബവ്കോ ആരംഭിച്ചത്.