ചെന്നൈ : ഗൃഹപ്രവേശനത്തിന് മുൻപായി ഐശ്വര്യത്തിന് പൂവൻകോഴിയെ ബലി നൽകാൻ പോയയാൾക്ക് ഇരുപതടി താഴ്ചയുള്ള കുഴിയിൽ വീണ് ദാരുണാന്ത്യം. തമിഴ്നാട്ടിലെ ചെന്നൈയിലാണ് രാജേന്ദ്രൻ എന്ന എഴുപതുകാരൻ മരണപ്പെട്ടത്. പല്ലാവരത്തിനടുത്തുള്ള പൊഴിച്ചാലൂരിൽ ലോകേഷ് എന്നയാൾ അടുത്തിടെ നിർമ്മിച്ച മൂന്ന് നിലയുള്ള വീട്ടിലാണ് ഇയാൾ കോഴിയുമായി എത്തിയത്. ലോകേഷാണ് രാജേന്ദ്രനോട് കോഴിയ ബലിയർപ്പിക്കാൻ ആവശ്യപ്പെട്ടത്. എന്നാൽ പുതിയ വീട്ടിൽ ലിഫ്റ്റ് സ്ഥാപിക്കുന്നതിനായി എടുത്ത കുഴിയിലാണ് രാജേന്ദ്രൻ കാൽ വഴുതി വീണത്.

രക്തബലി അർപ്പിക്കാൻ കോഴിയുമായി മൂന്നാം നിലയിലെത്തിയപ്പോഴാണ് രാജേന്ദ്രൻ താഴേക്ക് പതിച്ചത്. കോഴിയുമായി പോയ രാജേന്ദ്രൻ മടങ്ങി വരാത്തതിനെ തുടർന്നാണ് ലോകേഷ് അന്വേഷിച്ച് ഇറങ്ങിയത്. സ്ഥലത്തെത്തിയ ലോകേഷിന് കുഴിയിൽ രക്തത്തിൽ കുളിച്ച് കിടക്കുന്ന രാജേന്ദ്രനെയാണ് കാണാനായത്. ഇയാളുടെ തൊട്ടടുത്തായി കൊല്ലാൻ കൊണ്ടുവന്ന കോഴി നിൽക്കുന്നുണ്ടായിരുന്നു. പരിക്കേറ്റ രാജേന്ദ്രനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.