വ്യക്തിഗത ക്ളൗഡ് സ്റ്റോറേജിൽ അടക്കം വമ്പൻ മാറ്റങ്ങൾ അവതരിപ്പിക്കാനൊരുങ്ങി ഗൂഗിൾ. ജിമെയിൽ ഗൂഗിൾ, ഡ്രൈവ് എന്നീ ഗൂഗിൾ സേവനങ്ങൾ ഉപയോഗിക്കുന്നവർ സാധാരണയായി നേരിട്ട് വരുന്ന പ്രശ്നമായിരുന്നു സ്റ്റേറേജ് സ്പേസിന്റെ അപര്യാപ്തത. നിലവിൽ അത്ര കുറവല്ലാത്ത 15 ജിബി സ്റ്റോറേജ് സൗകര്യം ഗൂഗിൾ ലഭ്യമാക്കുന്നുണ്ടെങ്കിലും കൂടുതൽ വിവരങ്ങൾ അപ്‌ലോഡ് ചെയ്യാനായി ചില ഫയലുകൾ നീക്കം ചെയ്യുകയാണ് ഇപ്പോഴുള്ള ഏകവഴി. അല്ലെങ്കിൽ പണം ചിലവാക്കി കൂടുതൽ ക്ളൗഡ് സ്റ്റോറേജ് സ്വന്തമാക്കേണ്ടി വരും.

5ജി വേഗതയിലേയ്ക്ക് ടെക്ക് ലോകം എത്തി നിൽക്കുന്നതോടെ 15 ജിബി എന്നുള്ളത് മുൻപുള്ളതിൽ നിന്നും ചെറിയ സ്റ്റോറേജ് സൗകര്യമായി ആണ് കണക്കാക്കപ്പെടുന്നത്. നിലവിൽ 15 ജിബിയിൽ നിന്നും 1 ടിബി സുരക്ഷിത ക്ളൗഡ് സ്റ്റോറേജ് ഉടൻ തന്നെ ലഭ്യമാക്കുമെന്നാണ് ഗൂഗിൾ ബ്ളോഗിലൂടെ അറിയിച്ചിരിക്കുന്നത്. വ്യക്തിഗത വർക്ക്‌സ്പേസ് ഉപയോക്താക്കൾക്കായി കൂടുതൽ സവിശേഷതകൾ അവതരിപ്പിക്കപ്പെടുമെന്നും ഗൂഗിൾ അവകാശപ്പെടുന്നുണ്ട്. പുതുക്കിയ സുരക്ഷിതമായ ക്ളൗഡ് സ്റ്റോറേജ്, മാൽവേർ, സ്പാം, റാൻസംവേർ ആക്രമണങ്ങളിൽനിന്നുള്ള സുരക്ഷ, പല വ്യക്തികൾക്ക് ഒരേസമയം സന്ദേശം അയക്കാൻ കഴിയുന്ന മെയിൽമെർജ് സംവിധാനം എന്നിവ ഇതിൽ ഉൾപ്പെടുമെന്നാണ് വിവരം.

ജി സ്യൂട്ടിന്റെ പിൻഗാമിയായി 2020-ലാണ് ഗൂഗിൾ വ്യക്തിഗത വർക്ക് സ്പേസ് അവതരിപ്പിച്ചത്. ജി മെയിൽ, ക്ളൗഡ് , ഗൂഗിൾ കലണ്ടർ, കോണ്ടാക്ട്സ് എന്നിവയടങ്ങുന്ന ഗൂഗിൽ നിർമിതികൾ ലഭ്യമാകുന്ന പ്ളാറ്റ്ഫോമായ ഗൂഗിൾ വർക്ക് സ്പേസിന്റെ അടിസ്ഥാന പതിപ്പ് സൗജന്യമാണ്.