തിരുവനന്തപുരം: ലക്ഷങ്ങൾ വിലയുള്ള ശ്രവണസഹായി നഷ്ടമായ ബധിര വിദ്യാ‌ർത്ഥി റോഷന് നഗരസഭ ഇടപെടലിലൂടെ പുതിയ ശ്രവണ സഹായി ലഭിക്കും. നാളെ രാവിലെ ഒമ്പത് മണിക്ക് തന്നെ റോഷന്റെ വീട്ടിലെത്തി പുതിയ ശ്രവണ സഹായി മേയർ ആര്യാ രാജേന്ദ്രൻ നേരിട്ട് കൈമാറും. കിംസ് ആശുപത്രിയുടെ സഹായത്തോടെയാണ് റോഷന് സനേഹസമ്മാനമായി പുത്തൻ ശ്രവണ സഹായി നൽകുന്നത്. റോഷന്റെ ശ്രവണ സഹായി തിരികെ ലഭിച്ചില്ലെങ്കിൽ പുതിയത് വാങ്ങി നൽകാനുള്ല നടപടികൾ നഗരസഭ കൈക്കൊള്ളുമെന്ന് മേയർ ആര്യാ രാജേന്ദ്രൻ തന്റെ ഫേസ്ബുക്ക് കുറിപ്പിലൂടെ നേരത്തെ അറിയിച്ചിരുന്നു. ഇതിന് പിന്നാലെയാണ് പുതിയ ശ്രവണ സഹായി റോഷന് കൈമാറുന്നത്.

തിരുവനന്തപുരം രാജാജി നഗർ സ്വദേശിയായ റോഷന്റെ ഒന്നര ലക്ഷം രൂപ വില വരുന്ന ശ്രവണ സഹായി അച്ഛനോടൊപ്പം ബൈക്കിൽ സഞ്ചരിക്കവേ സ്കൂൾ ബാഗിനോടൊപ്പമാണ് നഷ്ടമായത്.ശ്രവണ സഹായി ലഭിക്കുന്നവർ അറിയിക്കാനായി റോഷന്റെ അമ്മ പങ്കുവെച്ച കുറിപ്പ് സോഷ്യൽ മീഡിയ വഴി വലിയ രീതിയിൽ പ്രചരിക്കുകയും വാർത്താ മാദ്ധ്യമങ്ങളടക്കം റിപ്പോർട്ട് ചെയ്യുകയും ചെയ്തിരുന്നു. ഇത് ശ്രദ്ധയിൽപ്പെട്ടതിനെ തുടർന്നാണ് മേയർ വിഷയത്തിൽ ഇടപെടുകയായിരുന്നു. ശ്രവണ സഹായി കണ്ട് കിട്ടുന്നവർ കോർപ്പറേഷനിൽ എത്തിക്കാനോ, 9895444067 എന്ന നമ്പർ മുഖേന ബന്ധപ്പെടാനോ മേയർ തന്റെ ഫേസ്ബുക്ക് കുറിപ്പിലൂടെ അവശ്യപ്പെട്ടിരുന്നു. തിരികെ ലഭിച്ചില്ലെങ്കിൽ സ്പോൺസർഷിപ്പിലൂടെ പുതിയ ശ്രവണ സഹായി വാങ്ങി നൽകാൻ ശ്രമിക്കുമെന്നും അറിയിച്ചിരുന്നു. ഇത് ശരി വെക്കുന്ന തരത്തിലുള്ള വിവരമാണ് ഇപ്പോൾ തിരുവനന്തപുരം നഗരസഭ പങ്കുവെച്ചിരിക്കുന്നത്. പുനർജ്ജനി പദ്ധതി പ്രകാരം നാല് മാസം മുൻപാണ് റോഷന് ഒന്നര ലക്ഷം രൂപ വിലയുള്ള ശ്രവണ സഹായി ലഭിച്ചത്.