കോട്ടയം: ശബരിമല സ്ത്രീ പ്രവേശവുമായി ബന്ധപ്പെട്ട് നടന്ന നാമജപ ഘോഷയാത്രയിൽ പങ്കെടുത്തവർക്കെതിരെയുള്ല കേസുകൾ ഒഴിവാക്കണമെന്ന് വീണ്ടും ആവശ്യപ്പെട്ട് എൻ എസ് എസ്. പലതവണ ആവശ്യപ്പെട്ടിട്ടും കേസ് പിൻവലിക്കാത്തത് ഹൈന്ദവ വിശ്വാസികൾക്ക് എതിരായ വെല്ലുവിളിയാണോ എന്ന് സംശയമുണ്ടെന്ന് ജനറൽ സെക്രട്ടറി ജി സുകുമാരൻ നായർ പ്രസ്താവനയിൽ പറഞ്ഞു.

നിരപരാധികളായ പലർക്കും എതിരെ കേസെടുത്ത സാഹചര്യമാണ് നിലവിലുള്ലതെന്നും പല യുവതീ യുവാക്കൾക്കും ഇതുമൂലം സർക്കാർ നിയമനങ്ങളിൽ ബുദ്ധിമുട്ട് നേരിടുന്നതായും സുകുമാരൻ നായർ ചൂണ്ടിക്കാട്ടി. ഇതിലും ഗൗരവമേറിയ പല കേസുകളും പിൻവലിക്കാൻ സർക്കാർ തയ്യാറായി. എന്നിട്ടും ഇക്കാര്യത്തിൽ മാത്രം നിസം​ഗത തുടരുന്നത് ദുരൂഹമാണ്. നാമജപ ഘോഷയാത്രയുമായി ബന്ധപ്പെട്ട കേസുകൾ പിൻവലിക്കാനുള്ള ധാർമ്മിക ഉത്തരവാദിത്വം സർക്കാരിനുണ്ട്. അതിനാൽ ഇനിയെങ്കിലും കേസുകൾ പിൻവലിക്കാൻ തയ്യാറാകണമെന്ന് അദ്ദേഹം ആവശ്യപ്പെട്ടു.