സമകാലിക സംഭവങ്ങളും പ്രണയവുമെല്ലാം ഒത്തുചേർന്ന ഫാമിലി എന്റർടെയിനറാണ് തിങ്കളാഴ്ച നിശ്ചയം. ചിത്രത്തിന് മികച്ച പ്രേക്ഷക സ്വീകാര്യതയാണ് ലഭിച്ചത്. ദേശീയ ചലച്ചിത്ര പുരസ്‌കാരമടക്കം ഈ കുഞ്ഞുചിത്രത്തെ തേടിയെത്തിയിരുന്നു.
തിങ്കളാഴ്ച നിശ്ചയം അണിയിച്ചൊരുക്കിയ സെന്ന ഹെഗ്‌ഡെ കൗമുദി മൂവീസിലൂടെ തന്റെ പുത്തൻ സിനിമാ വിശേഷങ്ങൾ പങ്കുവയ്ക്കുന്നു. തിങ്കളാഴ്ച നിശ്ചയത്തിലെ ഒരു താരത്തിനും സ്‌ക്രിപ്റ്റ് അറിയില്ലായിരുന്നുവെന്ന് സംവിധായകൻ പറയുന്നു.
സെന്ന ഹെഗ്‌ഡെയുടെ '1744 വൈറ്റ് ആൾട്ടോ' എന്ന ചിത്രത്തിലെ റാപ്പ് ഗാനം കഴിഞ്ഞ ദിവസം പുറത്തിറങ്ങിയിരുന്നു. ഇതൊരു ക്രൈം കോമഡി ചിത്രമാണെന്നാണ് സംവിധായകൻ പറയുന്നത്. ഈ സിനിമയും തിങ്കളാഴ്ച നിശ്ചയവും തമ്മിൽ യാതൊരു സാമ്യവുമില്ലെന്നും ഹെഗ്‌ഡെ വ്യക്തമാക്കി.
മമ്മൂട്ടിയ്‌ക്കൊപ്പമോ മോഹൻലാലിനൊപ്പമോ പടം പ്രതീക്ഷിക്കാമോയെന്നും അവതാരകന്റെ ചോദ്യത്തിനോടും അദ്ദേഹം പ്രതികരിച്ചു. 'അവർ ലെജന്റ്സാണ്. ഒരു അവസരം വന്നാൽ തീർച്ചയായും ചെയ്യും. അതൊരു സ്വപ്ന സാക്ഷാത്കാരമായിരിക്കും.'- അദ്ദേഹം പറഞ്ഞു.