തിരൂരങ്ങാടി: തീപാറുന്ന സംവിധാനം സജ്ജീകരിച്ച കാറിന് മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം 44,​250 രൂപ പിഴ ചുമത്തി. അനധികൃത മോടി കൂട്ടലിനാണ് വെന്നിയൂർ സ്വദേശിയായ വാഹനഉടമയിൽ നിന്നു പിഴ ഈടാക്കിയത്.

ഹോണ്ട സിറ്റി കാറിന്റെ പുകക്കുഴലിൽ നിന്ന് തീ വരുന്ന രീതിയിൽ മാറ്റം വരുത്തിയിരുന്നു. ഇതിൽ നിന്നുള്ള തീ ഉപയോഗിച്ച് വിറക്,​ പേപ്പർ എന്നിവ കത്തിക്കുന്നതും നിരത്തിലോടുന്നതും ഇൻസ്റ്റഗ്രാമിൽ പോസ്റ്റ് ചെയ്തിരുന്നു. ഇത് കണ്ടാണ് ഉദ്യോഗസ്ഥർ കാർ പരിശോധിച്ചത്.
വാഹനത്തിന്റെ ഉയരം കൂട്ടാനും കുറയ്ക്കാനുമുള്ള സംവിധാനങ്ങൾ, തീവ്രത കൂടിയ ഹെഡ് ലൈറ്റ് എന്നിവയും ഘടിപ്പിച്ചിരുന്നു. ടയർ, സൈലൻസർ, ബോഡി തുടങ്ങിയവയിലും മാറ്റം വരുത്തിയിരുന്നു. ഏഴ് ദിവസത്തിനുള്ളിൽ വാഹനം യഥാർത്ഥ രൂപത്തിലാക്കി പരിശോധനയ്ക്ക് ഹാജരാക്കിയില്ലെങ്കിൽ രജിസ്‌ട്രേഷൻ റദ്ദാക്കുമെന്ന് ഉദ്യോഗസ്ഥർ അറിയിച്ചു.