ചെങ്ങന്നൂർ: പാണ്ടനാട് കോട്ടയം മങ്ങാട്ട്കാവ് ശ്രീഭദ്രകാളീക്ഷേത്രത്തിൽ ജീവത സമർപ്പണം നടത്തി. പാണ്ടനാട് വടക്ക് വാലയിൽ ( കാവേരി ) എം. കിഷോർകുമാർ, ബിനു കിഷോർ എന്നിവരുടെ വഴിപാടായാണ് ജീവത സമർപ്പിച്ചത്. നവരാത്രി മഹോത്സവത്തിനോടനുബന്ധിച്ചായിരുന്നു ചടങ്ങ്. ക്ഷേത്രം തന്ത്രി പറമ്പൂരില്ലത്ത് ത്രിവിക്രമൻ നാരായണ ഭട്ടതിരിപ്പാട് , മേൽശാന്തി സജീവ് ഉണ്ണി എന്നിവർ മുഖ്യകാർമ്മികത്വം വഹിച്ചു. അഷ്ടദ്രവ്യമഹാ ഗണപതി ഹോമം, അഖണ്ഡനാമജപയജ്ഞം, കലശം, അന്നദാനം, സേവ, വലിയ ഗുരുതി എന്നിവയും നടന്നു. പ്രസിഡന്റ് രവീന്ദ്രൻ നായർ, സെക്രട്ടറി രാജേഷ് കുമാർ എന്നിവർ നേതൃത്വം നൽകി.