കോന്നി : മലയാലപ്പുഴയിലെ മന്ത്രവാദിനി വാസന്തി അമ്മമഠം ശോഭനതിലകിനും ( വാസന്തി ) സഹായി ഉണ്ണികൃഷ്ണനും പത്തനംതിട്ട ജില്ലാ കോടതി ഉപാധികളോടെ ജാമ്യം അനുവദിച്ചു. മന്ത്രവാദത്തിന്റെ പേരിൽ കുട്ടിയെ ഉപദ്രവിക്കുകയും സംഭവത്തിനിടയിൽ കുട്ടി മയങ്ങി വീഴുന്നതുമായ ദൃശ്യങ്ങൾ പുറത്തുവന്നതോടെ ഇവർക്കെതിരെ പ്രതിഷേധം ശക്തമായതിനെ തുടർന്നാണ് പൊലീസ് ഇവരെ അറസ്റ്റുചെയ്തത്. വീട്ടിൽ ജോലിക്ക് നിന്നിരുന്ന സ്ത്രീയെ മന്ത്രവാദത്തിന്റെ പേരിൽ നെഞ്ചിൽ ചവിട്ടുകയും ഉപദ്രവിക്കുകയും ചെയ്യുന്ന ദൃശ്യങ്ങളും സമൂഹമാദ്ധ്യമങ്ങളിൽ പ്രചരിച്ചിരുന്നു. ജുവനൈൽ ജസ്റ്റിസ് ആക്ട് അടക്കം വകുപ്പുകൾ ചേർത്താണ് പൊലീസ് കുറ്റപത്രം സമർപ്പിച്ചത്. എന്നാൽ കുട്ടിയെ ഉപദ്രവിക്കുന്ന ദൃശ്യങ്ങൾ 2020ൽ നടന്നതാണെന്നും അന്ന് കുട്ടിക്ക് പ്രായ പൂർത്തി ആയിരുന്നില്ലെന്നും ഇപ്പോൾ പ്രായപൂർത്തി ആയതിനാൽ ജാമ്യം നൽകാമെന്നും ആയിരുന്നു കോടതിയുടെ നിരീക്ഷണം. സ്ത്രീയെ ഉപദ്രവിച്ച സംഭവത്തിലും കുട്ടിയെ ഉപദ്രവിച്ച സംഭവത്തിലും ഇരകൾ പരാതി നൽകിയിട്ടില്ലാത്തതും സംഭവത്തിൽ പ്രതികൾക്ക് ജാമ്യം ലഭിക്കുന്നതിന് കാരണമായി.