തിരുവല്ല: കാന്തിക ശക്തിയിൽ മുന്നോട്ടും പിന്നോട്ടും അതിവേഗം ചലിപ്പിക്കാവുന്നവിധം രൂപമാറ്റം വരുത്തിയ നമ്പർ പ്ലേറ്റ് ഘടിപ്പിച്ച ന്യുജെൻ ബൈക്ക് മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം പിടികൂടി. ഇന്നലെ ഇടിഞ്ഞില്ലം ജംഗ്ഷന് സമീപം നടത്തിയ വാഹന പരിശോധനയിലാണ് ചെങ്ങന്നൂർ തിരുവൻവണ്ടൂർ സ്വദേശി അരുൺ കുമാറിന്റെ ബൈക്ക് പിടികൂടിയത്. ബൈക്കിന്റെ പിന്നിലെ നമ്പർ പ്ലേറ്റിലാണ് കൃത്രിമത്വം കാട്ടിയത്. നമ്പർ പ്ലേറ്റിന്റെ മുന്നിലും പിന്നിലും നാല് കാന്തം ഘടിപ്പിച്ചാണ് അതിവേഗം ചലിപ്പിച്ചിരുന്നത്. വാഹന പരിശോധന സമയങ്ങളിൽ നിറുത്താതെ പോകുന്ന വാഹനങ്ങളുടെ പിൻവശത്തെ നമ്പർ പ്ലേറ്റാണ് മോട്ടോർ വാഹന വകുപ്പും പൊലീസും രേഖപ്പെടുത്താറുള്ളത്. മോട്ടോർ വാഹന വകുപ്പിന്റെയോ പൊലീസിന്റെയോ വാഹനപരിശോധന ശ്രദ്ധയിൽപ്പെട്ടാൽ പിന്നിലിരിക്കുന്ന സഹയാത്രികന് ഞൊടിയിടയിൽ മുന്നിലേക്കോ പിന്നിലേക്കോ ചലിപ്പിച്ച് നമ്പർപ്ലേറ്റ് അദൃശ്യമാക്കാവുന്ന തരത്തിലാണ് ഈ ബൈക്കിൽ സംവിധാനം ഒരുക്കിയിരിക്കുന്നത്. നമ്പർ പ്ലേറ്റിൽ ഇത്തരത്തിലുള്ള കൃത്രിമത്വം പത്തനംതിട്ട ജില്ലയിൽ പിടികൂടുന്നത് ആദ്യമായാണെന്ന് മോട്ടോർ വാഹന വകുപ്പ് ഉദ്യോഗസ്ഥർ പറഞ്ഞു. വാഹനമോടിച്ചിരുന്ന പ്രവീൺകുമാറിന്റെ ലൈസൻസ് റദ്ദ് ചെയ്യുന്നത് അടക്കമുള്ള നിയമനടപടികൾ സ്വീകരിക്കുമെന്നും ഉദ്യോഗസ്ഥർ പറഞ്ഞു.