കൊല്ലം: ഇരുചക്രവാഹനം മോഷ്ടിച്ച പ്രതിയെ മണിക്കൂറുകൾക്കുള്ളിൽ പൊലീസ് പിടികൂടി. പരവൂർ കോങ്ങൽ പനനിന്ന വീട്ടിൽ സെയ്ദലിയാണ്(19) പരവൂർ പൊലീസിന്റെ പിടിയിലായത്. കഴിഞ്ഞ ദിവസം വൈകിട്ട് 6ഓടെ പരവൂർ റെയിൽവേ സ്റ്റേഷൻ പാർക്കിംഗ് ഗ്രൗണ്ടിൽ സുക്ഷിച്ചിരുന്ന കലക്കോട് സ്വദേശി റഷിദിന്റെ മോട്ടോർ സൈക്കിളാണ് മോഷണം പോയത്. മോഷണ വിവരത്തെക്കുറിച്ച് പരവൂർ പൊലീസ് നൽകിയ വിവരത്തിന്റെ അടിസ്ഥാനത്തിൽ കൊല്ലം ഈസ്റ്റ് പൊലീസ് പ്രതിയെയും വാഹനവും കസ്റ്റഡിയിലെടുക്കുകയായിരുന്നു. മോഷണക്കേസുകളിൽ നേരത്തെയും ഇയാൾ പ്രതിയായിട്ടുണ്ട്. പരവൂർ പൊലീസ് ഇൻസ്‌പെക്ടർ നിസാർ.എയുടെ നേതൃത്വത്തിൽ എസ്‌.ഐമാരായ നിഥിൻ നളൻ, വിനയൻ എന്നിവരുൾപ്പെട്ട സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.