ഗുരുവായൂർ: ഗുരുവായൂർ ഏകാദശിയുടെ ഭാഗമായി ഒരു മാസം നീളുന്ന വിളക്കാഘോഷത്തിന് അടുത്ത മാസം നാലിന് തുടക്കം. പാലക്കാട് അലനല്ലൂർ പറമ്പോട്ട് അമ്മിണിയമ്മയുടെ വഴിപാടായാണ് ആദ്യ ദിവസത്തെ വിളക്ക്. വർഷങ്ങളായി അമ്മിണി അമ്മയുടെ പേരിലാണ് ആദ്യ വിളക്കാഘോഷം. അഞ്ചിന് ക്ഷേത്രം തന്ത്രി ചേന്നാസ് ദിനേശൻ നമ്പൂതിരിപ്പാടിന്റെയും ആറിന് ചാവക്കാട് മുൻസിഫ് കോടതിയുടെയും വകയാണ് വിളക്കാഘോഷം. വ്യക്തികളും സംഘടനകളും സ്ഥാപനങ്ങളും വഴിപാടായാണ് ഏകാദശിക്ക് മുന്നോടിയായി 30 ദിവസം വിളക്ക് നടത്തുന്നത്. ഡിസംബർ മൂന്നിനാണ് ഏകാദശി. ഏകാദശി നാളിൽ ദേവസ്വം വക ഉദയാസ്തമയ പൂജയോടെയാണ് വിളക്കാഘോഷം.