കിളിമാനൂർ: ചിത്രകാരൻ രാജാ രവിവർമയുടെ 116-ാം ചരമദിനത്തിൽ ഒരു മാസം നീണ്ടുനിൽക്കുന്ന വിന്റർ ആർട്‌സ് റെസിഡൻസി പ്രോഗ്രാം ആരംഭിക്കാനായത് ഏറെ ചാരിതാർത്ഥ്യജനകമാണെന്ന് പ്രശസ്ത ശിൽപ്പി എൻ.എൻ. റിംസൺ പറഞ്ഞു.
കേരള ലളിതകലാ അക്കാഡമി സംസ്ഥാന അവാർഡു നേടിയ കലാകാരന്മാർക്കായി സംഘടിപ്പിക്കുന്ന ആദ്യ വിന്റർ ആർട് റെസിഡൻസിക്ക് കിളിമാനൂരിലെ രാജാ രവിവർമ മെമ്മോറിയൽ കൾച്ചറൽ കോംപ്ലക്‌സിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അക്കാഡമി സെക്രട്ടറി എൻ. ബാലമുരളീകൃഷ്ണൻ അദ്ധ്യക്ഷത വഹിച്ചു. അക്കാഡമി നിർവാഹകസമിതി അംഗളായ ടോം ജെ വട്ടക്കുഴി, ലത കുര്യൻ, കിളിമാനൂർ പഞ്ചായത്ത് പ്രസിഡന്റ് ടി. ആർ. മനോജ്, വാർഡംഗം കൊട്ടറ മോഹൻകുമാർ എന്നിവർ സംസാരിച്ചു. അബ്ദുള്ള പി. എ, ബിജി ഭാസ്‌കർ, ദീപാ ഗോപാൽ, ഷജിത് ആർ.ബി, സ്മിത എം. ബാബു എന്നീ കലാകാരന്മാരാണ് റെസിഡൻസിയിൽ പങ്കെടുക്കുന്നത്.