നെയ്യാറ്റിൻകര: നിരവധി ക്രിമിനൽ കേസുകളിലെ പ്രതിയെ നെയ്യാറ്റിൻകര പൊലീസ് അറസ്റ്റ് ചെയ്തു. പെരുമ്പഴുതൂർ അയണിയറത്തല കിഴക്കുംകര വീട്ടിൽ അപ്പുണ്ണി എന്ന ശോഭലാലാണ് (22) പിടിയിലായത്. ഓഗസ്റ്റ് 8ന് രാത്രി 10.45ന് പെരുമ്പഴുതൂർ ജംഗ്ഷനിൽ സംഘടിപ്പിച്ച അനുമോദ ചടങ്ങുമായി ബന്ധപ്പെട്ട് കൊടിതോരണങ്ങൾ കെട്ടിക്കൊണ്ടിരുന്ന പെരുമ്പഴുതൂർ സ്വദേശിയായ അഖിലിനെയും കൂടെയുള്ളവരെയും ഇരുമ്പ് കമ്പിയും ഇടിക്കട്ടയും ഉപയോഗിച്ച് ആക്രമിച്ച് പരിക്കേൽപ്പിച്ച കേസിൽ ഒളിവിൽ കഴിയവെയാണ് കഴിഞ്ഞ ദിവസം ഇയാളെ പിടികൂടിയത്. പൊലീസ് ഇൻസ്‌പെക്ടർ കെ.ആ‌ർ. ബിജുവിന്റെ നേതൃത്വത്തിൽ എസ്.ഐമാരായ ആർ.സജീവ്, ഗ്ലിസ്റ്റൺ പ്രകാശ്, ജോണി ആർ.ജെ, എസ്.സി.പി.ഒമാരായ നോബിൾ സിംഗ്, വിഷ്ണു, അനന്തകൃഷ്ണൻ എന്നിവർ ചേർന്നാണ് പ്രതിയെ അറസ്റ്റ് ചെയ്തത്. നെയ്യാറ്റിൻകര, മാരായമുട്ടം സ്റ്റേഷനുകളിൽ ഉൾപ്പെടെ നിരവധി കേസുകളുള്ള പ്രതി നെയ്യാറ്റിൻകര സ്റ്റേഷനിലെ റൗഡി ലിസ്റ്റിൽപ്പെട്ടയാളാണ്.