ഐശ്വര്യ സംവിധാനം ചെയ്യുന്ന ചിത്രത്തിൽ ആദ്യമായി രജനികാന്ത് നായകൻ. നെൽസൺ ദിലീപ് കുമാർ സംവിധാനം ചെയ്യുന്ന ജയിലർ പൂർത്തിയാക്കിയശേഷം രജനികാന്ത് ഐശ്വര്യയുടെ ചിത്രത്തിൽ അഭിനയിക്കുമെന്നാണ് വിവരം. രജനി നായകനായി അഭിനയിച്ച ദർബാർ എന്ന സിനിമയുടെ നിർമ്മാതാക്കളാണ് ഐശ്വര്യയുടെ ചിത്രം നിർമ്മിക്കുന്നത്. ഐശ്വര്യ സംവിധാനം ചെയ്യുന്ന മൂന്നാമത് ചിത്രമാണിത്. ധനുഷിനെ നായകനാക്കി മൂന്ന് എന്ന ചിത്രം ആണ് ഐശ്വര്യയുടെ ആദ്യ സംവിധാന സംരംഭം. രജനിയുടെ ഇളയ മകളായ സൗന്ദര്യ സംവിധാനം ചെയ്ത കൊച്ചടയാൻ എന്ന ചിത്രത്തിൽ രജനികാന്ത് നായകനായി അഭിനയിച്ചിരുന്നു. ഡോൺ എന്ന ശിവകാർത്തികേയൻ ചിത്രത്തിന്റെ സംവിധായകൻ സിബി ചക്രവർത്തിയുടെ സിനിമയിലും രജനികാന്ത് അഭിനയിക്കുന്നുണ്ട്.

അതേസമയം ധനുഷും ഐശ്വര്യയും ജീവിതത്തിൽ വീണ്ടും ഒരുമിക്കാൻ പോവുകയാണെന്നാണ് റിപ്പോർട്ട്. ഇരുവരെയും ഒരുമിക്കാൻ ബന്ധുക്കളും അടുത്ത സുഹൃത്തുക്കളും ശ്രമം നടത്തിയത് വിജയം കണ്ടെന്നാണ് സൂചന.