തിരുവനന്തപുരം: പ്രമുഖ വ്യവസായ ഗ്രൂപ്പായ ഹിന്ദുജയുടെ നേതൃത്വത്തിൽ കേരളത്തിൽ അശോക് ലൈലാൻഡ് ഇലക്ട്രിക് ബസുകൾ നിർമ്മിക്കും. ലണ്ടനിൽ മുഖ്യമന്ത്രി പിണറായി വിജയനുമായി ഹിന്ദുജ ഗ്രൂപ്പ് കോ ചെയർമാൻ ഗോപിചന്ദ് നടത്തിയ കൂടിക്കാഴ്ചയിലാണ് തീരുമാനം. തുടർ നടപടികൾക്കായി ഡിസംബറിൽ കേരളത്തിലെത്താമെന്നും ഗോപിചന്ദ് ഹിന്ദുജ മുഖ്യമന്ത്രിക്ക് ഉറപ്പ് നൽകി.അതിനു മുന്നോടിയായ ചർച്ചകൾക്കായി മൂന്നംഗ ടീമിനെ ഹിന്ദുജ ചുമതലപ്പെടുത്തി.കേരളത്തിൽ ഫാക്ടറി തുടങ്ങണമെന്ന മുഖ്യമന്ത്രിയുടെ അഭ്യർത്ഥന മാനിച്ചാണ് പ്രത്യേക സംഘത്തെ അയക്കാൻ നിശ്ചയിച്ചത്. അനുയോജ്യമായ സ്ഥലം ഉൾപ്പെടെ ഈ സംഘം സന്ദർശനം നടത്തി നിർദ്ദേശിക്കും. ഇലക്ട്രിക് ബസ് നിർമ്മാണത്തിന് പുറമെ , സൈബർ രംഗം, ഫിനാൻസ് എന്നീ മേഖലകളിൽ കേരളത്തിൽ നിക്ഷേപം നടത്തുമെന്ന് ചർച്ചയിൽ ഹിന്ദുജ ഗ്രൂപ്പ് അറിയിച്ചു.

സൈബർ ക്രൈം നേരിടുന്നതിനുള്ള ആധുനിക സംവിധാനങ്ങൾ ഹിന്ദുജ ഗ്രൂപ്പ് വികസിപ്പിച്ചിട്ടുണ്ട്. കേരളത്തിലെ ഐ.ടി മാനവവിഭവശേഷി വിനിയോഗിക്കാൻ കഴിയുംവിധം കാമ്പസ് ആരംഭിക്കുന്ന കാര്യം പരിഗണിക്കും. വിദ്യാഭ്യാസം, ആരോഗ്യം, ധനകാര്യം എന്നീ മേഖലകളിലും നിക്ഷേപ സാധ്യതകൾ പരിശോധിക്കും.

മുഖ്യമന്ത്രിക്കൊപ്പം വ്യവസായ മന്ത്രി പി.രാജീവ്, നോർക്ക റൂട്ട്സ് വൈസ് ചെയർമാൻ എം.എ. യൂസഫലി ,ചീഫ് സെക്രട്ടറി ഡോ. വി പി ജോയ് , വ്യവസായ പ്രിൻസിപ്പൽ സെക്രട്ടറി സുമൻ ബില്ല എന്നിവരും ചർച്ചകളിൽ പങ്കെടുത്തു.