തിരുവനന്തപുരം: പ്രമുഖ ടൂറിസം അക്കാഡമിഷ്യനും റിസർച്ചറുമായ ഡോ.ദിലീപ് എം.ആറിനെ കിറ്റ്സിന്റെ ഡയറക്ടറായി സർക്കാർ നിയമിച്ചു. ദിലീപിനെ ഡെപ്യൂട്ടേഷൻ വ്യവസ്ഥയിലാണ് ടൂറിസം വകുപ്പിന് കീഴിലുള്ള കേരള ഇൻസ്റ്റിറ്റ്യൂട്ട് ഒഫ് ടൂറിസം ആൻഡ് ട്രാവൽ സ്റ്റഡീസ് (കിറ്റ്സ്)ൽ നിയമിച്ചത്. പുൽപള്ളി പഴശ്ശിരാജാ കോളേജിലെ ടൂറിസം അസോസിയേറ്റ് പ്രൊഫസറും വൈസ് പ്രിൻസിപ്പലുമായിരുന്നു. ഒമാനിലെ ഉന്നതവിദ്യാഭ്യാസ മന്ത്രാലയത്തിൽ ഏഴു വർഷം ടൂറിസം ഫാക്കൽറ്റിയും സിസ്റ്റം വൈഡ് കോർഡിനേറ്ററായും പ്രവർത്തിച്ചിട്ടുള്ള ഡോ.ദിലീപ് വിവിധ ട്രാവൽ മാഗസിനുകളിൽ കോളമിസ്റ്റും അന്താരാഷ്ട്ര ജേർണലുകളിൽ നിരവധി പ്രബന്ധങ്ങളും ആഗോള തലത്തിൽ ഉപയോഗിക്കപ്പെടുന്ന ടൂറിസം റഫറൻസ് ഗ്രന്ഥങ്ങളും രചിച്ചിട്ടുണ്ട്. ടൂറിസം സർവവിജ്ഞാനകോശം തയ്യാറാക്കുന്ന വിദഗ്ദ്ധ പാനലിലും അംഗമായിരുന്നു.