തിരുവനന്തപുരം:കുളത്തൂർ ഗ്രാമപഞ്ചായത്തിന്റെ അഭിമാനമായി ഇഞ്ചിഗ്രാമം പദ്ധതി.എല്ലാ വീടുകളിലും കൃഷിരീതി പ്രോത്സാഹിപ്പിക്കുന്നതിന്റെ ഭാഗമായി കുളത്തൂർ ഗ്രാമപഞ്ചായത്തിന്റെ ജനകീയാസൂത്രണ പദ്ധതിയുടെ കീഴിൽ നടപ്പിലാക്കിയ ഇഞ്ചി ഗ്രാമം പദ്ധതിയുടെ ആദ്യഘട്ട പരീക്ഷണമാണ് വൻ വിജയമായത്.കൃഷിയിടങ്ങൾക്ക് പുറമേ വീടുകളുടെ പരിസരങ്ങളിലും ഇഞ്ചി കൃഷി പ്രോത്സാഹിപ്പിക്കുന്നതാണ് പദ്ധതി.ഇതിന്റെ ഭാഗമായി ഓരോ ഗുണഭോക്താവിനും അഞ്ച് കിലോ ഇഞ്ചി വിത്തുകൾ കൃഷിഭവന്റെ നേതൃത്വത്തിൽ മാർച്ച് മാസം വിതരണം ചെയ്തിരുന്നു. വിതരണം ചെയ്യുന്ന വിത്തുകളുടെ പരിപാലനം യഥാസമയം കൃഷിഭവനുകൾ വഴി വിലയിരുത്തുകയും ചെയ്തു.ഇഞ്ചി നട്ട് ഏഴെട്ടുമാസം പ്രായമാകുന്നതോടെ അവയുടെ ഇലകളും തണ്ടുകളും ഉണങ്ങിത്തുടങ്ങും. ഈ ഘട്ടമാണ് വിളവെടുപ്പിന് അനുയോജ്യം.ഇലകളും തണ്ടുകളും പൂർണമായും ഉണങ്ങിയപ്പോഴാണ് വിളവെടുപ്പ് ആരംഭിച്ചത്.10 സെന്റ് കൃഷിയിടത്തിൽ നിന്ന് 500 കിലോ വരെ ഇഞ്ചിയാണ് ഇത്തരത്തിൽ ലഭിച്ചത്.ഇതോടെ ഇഞ്ചി ഉത്പാദനത്തിൽ സ്വയംപര്യാപ്തമാവാൻ കുളത്തൂരിന് സാധിച്ചു.