തിരുവനന്തപുരം: ഗുണനിലവാരമില്ലാത്ത മരുന്നുകൾ കേരളത്തിൽ വിറ്റഴിക്കുന്നുവെന്ന ഞെട്ടിക്കുന്ന വിജിലൻസ് കണ്ടെത്തലിൽ സർക്കാർ അനങ്ങുന്നില്ലെന്ന് കോൺഗ്രസ് നേതാവ് രമേശ് ചെന്നിത്തല ആരോപിച്ചു.

ജനങ്ങളുടെ ആരോഗ്യ സംരക്ഷണം ഉറപ്പു വരുത്തേണ്ട ആരോഗ്യ വകുപ്പ് ഉറക്കത്തിലാണ്. ഗുരുതരമായ ക്രമക്കേടുകളാണ് ഡ്രഗ്സ് കൺട്രോൾ വിഭാഗത്തിൽ നടക്കുന്നത്. മരുന്നു പരിശോധന കാര്യക്ഷമമല്ലാത്തതാണ് ഗുണനിലവാരമില്ലാത്ത മരുന്നു വില്‌പനയ്ക്ക് കാരണം. പേ വിഷബാധയ്ക്കെതിരായ വാക്‌സിനെക്കുറിച്ച് പരാതി വന്നപ്പോൾ, മറ്റ് മരുന്നുകളുടെ ഗുണനിലവാരവും പരിശോധിക്കണമായിരുന്നു. വിവാദങ്ങളിൽപ്പെട്ടു കിടക്കുന്ന സർക്കാരിന് ഇതിനൊന്നും സമയമില്ല .മരുന്നു വിലയും ദിനം പ്രതി കുത്തനെ കൂടുകയാണ്. കൊവിഡിന് ശേഷം പല അവശ്യ മരുന്നുകൾക്കും നൂറു മുതൽ ഇരുന്നൂറു ശതമാനം വരെയാണ് വില കൂടിയതെന്ന് ചെന്നിത്തല പറഞ്ഞു.