തിരുവനന്തപുരം: പഠനസഹായവും പഠനോപകരണവും വിതരണം നടത്തി അവ സ്വീകരിക്കുന്ന കുട്ടികളുടെ ഫോട്ടോ പത്ര-സമൂഹമാദ്ധ്യമങ്ങളിൽ പ്രചരിപ്പിക്കുന്നതിന് വനിതാ ശിശു വികസന വകുപ്പ് വിലക്കേർപ്പെടുത്തി ഉത്തരവിറക്കി.

സന്നദ്ധ സംഘടനകളും സ്വകാര്യ വ്യക്തികളും രാഷ്ട്രീയ പാർട്ടികളും സാമ്പത്തികമായി പിന്നാക്കം നിൽക്കുന്ന 18 വയസിൽ താഴെയുള്ള കുട്ടികൾക്ക് സഹായ വിതരണം നടത്തിയ ശേഷം ചിത്രങ്ങൾ പ്രചരിപ്പിച്ചാൽ കർശന നടപടി സ്വീകരിക്കുമെന്നും ഉത്തരവിലുണ്ട്.കുട്ടികളുടെ ആത്മാഭിമാനം,സ്വകാര്യത,സാമൂഹിക ജീവിതം എന്നിവ കണക്കിലെടുത്ത് ബാലനീതി നിയമപ്രകാരമാണ് ഉത്തരവ്.സംസ്ഥാന ബാലാവകാശ സംരക്ഷണ കമ്മിഷൻ,ജില്ല കളക്ടർമാർ,ശിശു സംരക്ഷണ ഉദ്യോഗസ്ഥർ എന്നിവരുടെ നേതൃത്വത്തിൽ ഈ വിഷയത്തിൽ നിരീക്ഷണമുണ്ടാകും.