തിരുവനന്തപുരം: സംസ്ഥാനത്തെ സ്പോർട്സ് സ്‌കൂളുകൾക്ക് പ്രത്യേക പാഠ്യപദ്ധതി വികസിപ്പിക്കാൻ മുഖ്യമന്ത്രി പിണറായി വിജയന്റെ അദ്ധ്യക്ഷതയിൽ ചേർന്ന ഉന്നതതല യോഗം തീരുമാനിച്ചു. പാഠ്യപദ്ധതി വികസിപ്പിക്കുന്നതിനുള്ള ചുമതല എസ്.സി.ഇ.ആർ.ടിക്ക് നൽകും. സ്പോർട്സ് സ്കൂളുകളുടെ പ്രവർത്തനം കാര്യക്ഷമമാക്കാൻ പ്രിൻസിപ്പൽ തസ്തിക സൃഷ്ടിച്ച് ഒരു മാസത്തിനുള്ളിൽ നിയമനം നടത്തുകയും സ്പോർട്സ് റസിഡൻഷ്യൽ
സ്കൂൾ സംവിധാനത്തിൽ പ്രവർത്തിക്കാൻ താത്പര്യവും അഭിരുചിയുമുള്ള അദ്ധ്യാപകരെ കണ്ടെത്തി ഒരു മാസത്തിനകം സ്പോർട്സ് സ്കൂളുകളിൽ പുനർവിന്യസിക്കുകയും ചെയ്യും. ചോദ്യപേപ്പർ തയാറാക്കൽ, അച്ചടി, പരീക്ഷാ നടത്തിപ്പ്, മൂല്യ നിർണയം, ഫലപ്രഖ്യാപനം, സർട്ടിഫിക്കറ്റ് വിതരണം എന്നിവ സമയബന്ധിതമായി നടപ്പാക്കുന്നതിന് പരീക്ഷാഭവനെ ചുമതലപ്പെടുത്തും. അടുത്ത 5 വർഷത്തിനുള്ളിൽ ആവശ്യമായ സൗകര്യങ്ങളോടെ കൂടുതൽ കുട്ടികൾക്ക് പ്രവേശനമൊരുക്കുന്നതോടൊപ്പം സ്‌പോർടസ് ഹോസ്റ്റലുകളിൽ ആവശ്യമായ കുട്ടികളെ ശാസ്ത്രീയ മാനദണ്ഡങ്ങളുടെ അടിസ്ഥാനത്തിൽ റിക്രൂട്ട് ചെയ്യും. യോഗത്തിൽ പൊതുവിദ്യാഭ്യാസ വകുപ്പ് മന്ത്രി വി. ശിവൻകുട്ടി, കായിക വകുപ്പ് മന്ത്രി വി. അബ്ദു റഹ്മാൻ എന്നിവർ പങ്കെടുത്തു.