നടപടി കേരളകൗമുദി വാർത്തയെത്തുടർന്ന്

ആലപ്പുഴ: കൊവിഡിനെത്തുടർന്ന് ആലപ്പുഴ കെ.എസ്.ആർ.ടി.സി സ്റ്റാൻഡിൽ അടച്ചുപൂട്ടിയ പൊലീസ് എയ്ഡ് പോസ്റ്റി​ന്റെ പ്രവർത്തനം പൂർണതോതിൽ പുനരാരംഭിച്ചു. "ആളനക്കമില്ലാതെ പൊലീസ് എയ്ഡ് പോസ്റ്റ്"എന്ന തലക്കെട്ടിൽ കേരളകൗമുദി ഒക്ടോബർ 13ന് പ്രസിദ്ധീകരിച്ച വാർത്തയെ തുടർന്നാണ് നടപടി.

പൊലീസ് എയ്ഡ് പോസ്റ്റ് പ്രവർത്തനം നിലച്ചതോടെ രാപ്പകൽ ഭേദമില്ലാതെ പോക്കറ്റടിക്കാരും മറ്റ് സാമൂഹ്യ വിരുദ്ധരും സ്റ്റാൻഡിൽ വി​ലസുകയായി​രുന്നു. ആലപ്പുഴ സൗത്ത് പൊലീസിന്റെ നിയന്ത്രണത്തിലാണ് എയ്ഡ് പോസ്റ്റി​ന്റെ പ്രവർത്തനം. ബസ് സ്റ്റേഷന്റെ തുടക്കം മുതൽ, പ്രധാന ഭാഗത്തുള്ള മുറിയാണ് എയ്ഡ് പോസ്റ്റിനായി നൽകിയത്.

കൊവിഡ് വ്യാപിച്ചതോടെ പ്രവർത്തനം താത്കാലികമായി നിറുത്തി​യതോടെ സ്ത്രീകൾ ഉൾപ്പെടെയുള്ള യാത്രക്കാർക്കെതി​രെയുള്ള ശല്യം വ്യാപകമായി​രുന്നു. സന്ധ്യമയങ്ങിയാൽ ഇവി​ടെ മദ്യപാനികളുടെ ശല്യവും രൂക്ഷമാണ്.

എയ്ഡ്‌പോസ്റ്റ് പ്രവർത്തനം പഴയപടിയാക്കണമെന്ന് ആവശ്യപ്പെട്ട് ജില്ലാ പൊലീസ് മേധാവിക്കും സൗത്ത് സ്റ്റേഷനിലും കെ.എസ്.ആർ.ടി.സി അധികൃതർ കത്ത് നൽകിയിട്ടും ഫലമുണ്ടായി​രുന്നി​ല്ല. സൗത്ത് സ്റ്റേഷനി​ൽ അംഗബലം കുറവാണെന്ന് പറഞ്ഞായിരുന്നു പ്രവർത്തനം തുടങ്ങാതി​രുന്നത്. കേരളകൗമുദി പ്രസിദ്ധീകരിച്ച വാർത്തയെ തുടർന്ന് ആലപ്പുഴ ഡിവൈ. എസ്.പി എൻ.ആർ.ജയരാജി​ന്റെ നിർദ്ദേശ പ്രകാരമാണ് എയ്ഡ് പോസ്റ്റി​ന്റെ പ്രവർത്തനം കഴിഞ്ഞ ദിവസം മുതൽപൂർണ്ണ തോതിൽ പ്രവർത്തനം ആരംഭിച്ചത്.

ബസ് സ്റ്റേഷനിൽ പകലും രാത്രിയിലും പൊലീസ് എയ്ഡ് പോസ്റ്റ് പ്രർത്തിച്ചു തുടങ്ങിയത് വളരെ ആശ്വാസകരമാണ്. സാമൂഹ്യവി​രുദ്ധരുടെ ശല്യത്തിന് കുറവുണ്ടാകും

- സന്തോഷ് യാത്രക്കാരൻ