ചെറുകോൽ: ഈഴക്കടവ് ശ്രീനാരായണ ധർമ്മാശ്രമ സ്ഥാപകൻ ഗുരുധർമ്മാനന്ദ സ്വാമികളുടെ 28-ാംമത് സമാധി ദിനാചരണം 23 ന് ഗുരുധർമ്മാനന്ദ സമിതിയുടെ ആഭിമുഖ്യത്തിൽ ധർമ്മാനന്ദ ഗുരുകുലത്തിൽ നടക്കും. നാളെമുതൽ 27 വരെ പതിനൊന്നു ദിവസം നീണ്ടു നിൽക്കുന്ന മഹായജ്ഞവും നടക്കുമെന്ന് ഭാരവാഹികൾ അറിയിച്ചു. സമാധി ദിനാചരണത്തിന്റെ ഭാഗമായി 23 ന് രാവിലെ ഗുരുകുലാചാര്യൻ ഗംഗാധരൻ സ്വാമികളുടെ കാർമ്മികത്വത്തിൽ ഗുരുപൂജ, ഹവനം, യജ്ഞം എന്നിവ നടക്കും. 10 ന് നടക്കുന്ന പൊതുസമ്മേളനം എം.എസ് അരുൺകുമാർ ഉദ്‌ഘാടനം ചെയ്യും. സമിതി രക്ഷാധികാരിയും എസ്.എൻ.ഡി.പി യോഗം മാവേലിക്കര യൂണിയൻ മുൻ പ്രസിഡന്റുമായ കെ.ഗംഗാധരപ്പണിക്കർ അദ്ധ്യക്ഷത വഹിക്കും. പുതുപ്പള്ളി ചേവണ്ണൂർ തൃപ്പാദഗുരുകുലം ആചാര്യൻ ടി.പി രവീന്ദ്രൻ മുഖ്യപ്രഭാഷണവും ചെന്നിത്തല തൃപ്പെരുന്തുറ ഗ്രാമപഞ്ചായത്ത് പ്രസിഡന്റ് വിജയമ്മ ഫിലേന്ദ്രൻ, ഗ്രാമപഞ്ചായത്തംഗം ഗോപൻ ചെന്നിത്തല എന്നിവർ സമാധിദിന സന്ദേശവും നൽകും. ഗുരുകുലാചാര്യൻ സുന്ദരേശൻ സ്വാമി സംസാരിക്കും.സമിതി സെക്രട്ടറി ബി.ബാബു സ്വാഗതവും വൈസ് പ്രസിഡന്റ് ആർ.ശശികുമാർ നന്ദിയും പറയും. ഉച്ചക്ക് 1 ന് സമൂഹസദ്യ, 2.30 ന് സമിതി പ്രസിഡന്റ് എൻ.ശിവദാസൻ വസ്ത്രദാനം എന്നിവ നടക്കും. വൈകിട്ട് ദീപാരാധന, സമാധിപ്രാർത്ഥന എന്നിവയോടെ സമാധി ദിനാചരണം സമാപിക്കും.