ചേർത്തല: കടൽയറ്റം രൂക്ഷമായ ഒറ്റമശേരിയിൽ കൂടുതൽ പുലിമുട്ടുകൾ നിർമ്മിക്കുമെന്ന് മന്ത്റി പി.പ്രസാദ് പറഞ്ഞു. ഒ​റ്റമശ്ശേരി പുലിമുട്ട് നിർമ്മാണോദ്ഘാടനം നിർവഹിക്കുകയായിരുന്നു മന്ത്റി.
16 കോടി രൂപ ചെലവിൽ ഒ​റ്റമശേരിയിൽ 760 മീ​റ്റർ നീളത്തിൽ നിർമ്മിക്കുന്ന 7 പുലിമുട്ടികൾക്ക് പുറമേ 9 പുലിമുട്ടുകൾ കൂടി നിർമ്മിക്കാനുള്ള നടപടികൾ പുരോഗമിക്കുകയാണ്. ഇതിനായി 26 കോടി രൂപ അനുവദിക്കുന്നതിനുള്ള നടപടികൾ അവസാന ഘട്ടത്തിലാണെന്നും മന്ത്റി പറഞ്ഞു. കടക്കരപ്പള്ളി ഗ്രാമപഞ്ചായത്ത് പ്രസിഡന്റ് ജയിംസ് ചിങ്കുതറ അദ്ധ്യക്ഷനായി. ജില്ലാ പഞ്ചായത്തംഗം സജിമോൾ ഫ്രാൻസിസ്,ബ്ലോക്ക് പഞ്ചായത്തംഗം റാണി ജോർജ്, വാർഡംഗം കെ.ജെ.സ്​റ്റാലിൻ,ഒ​റ്റമശ്ശേരി സെന്റ് ജോസഫ് പള്ളി വികാരി ഫാ.അലക്സാണ്ടർ കൊച്ചിക്കാരൻ വീട്ടിൽ,കെ.ഐ.ഐ.ഡി.സി ചീഫ് എക്സിക്യൂട്ടീവ് ഓഫീസർ എസ്. തിലകൻ,എക്സിക്യൂട്ടീവ് എൻജിനീയർ ഹരൺ ബാബു,അസി.എക്സിക്യൂട്ടീവ് എൻജിനീയർ മഹാദേവൻ,വൻകിട ജലസേചന വകുപ്പ് എക്സിക്യൂട്ടീവ് എൻജിനീയർ ബിനു ബേബി തുടങ്ങിയവർ പങ്കെടുത്തു.