ചെറുകോൽ: ഈഴക്കടവ് ശ്രീനാരായണ ധർമ്മാശ്രമ സ്ഥാപകൻ ഗുരുധർമ്മാനന്ദ സ്വാമിയുടെ 28-ാം സമാധി ദിനാചരണം ഗുരുധർമ്മാനന്ദ സമിതിയുടെ ആഭിമുഖ്യത്തിൽ ധർമ്മാനന്ദ ഗുരുകുലത്തിൽ നടന്നു. ഇന്നലെ രാവിലെ ഗുരുപൂജ, ഹവനം, യജ്‌ഞം എന്നിവയ്ക്ക് ഗുരുകുലാചാര്യൻ ഗംഗാധരൻ സ്വാമി കാർമ്മികത്വം വഹിച്ചു. 10 ന് പൊതുസമ്മേളനം എം.എസ്. അരുൺകുമാർ എം.എൽ.എ ഉദ്‌ഘാടനം ചെയ്തു. സമിതി രക്ഷാധികാരിയും എസ്.എൻ.ഡി.പി യോഗം മാവേലിക്കര യൂണിയൻ മുൻ പ്രസിഡന്റുമായ കെ.ഗംഗാധരപ്പണിക്കർ അദ്ധ്യക്ഷത വഹിച്ചു.

പുതുപ്പള്ളി ചേവണ്ണൂർ തൃപ്പാദഗുരുകുലം ആചാര്യൻ ടി.പി. രവീന്ദ്രൻ മുഖ്യപ്രഭാഷണവും ചെന്നിത്തല തൃപ്പെരുന്തുറ ഗ്രാമപഞ്ചായത്ത് പ്രസിഡന്റ് വിജയമ്മ ഫിലേന്ദ്രൻ, ഗ്രാമപഞ്ചായത്തംഗം ഗോപൻ ചെന്നിത്തല, ഗുരുകുലാചാര്യൻ സുന്ദരേശൻ സ്വാമി എന്നിവർ സമാധിദിന സന്ദേശവും നൽകി. സമിതി സെക്രട്ടറി ബി. ബാബു സ്വാഗതവും വൈസ് പ്രസിഡന്റ് ആർ.ശശികുമാർ നന്ദിയും പറഞ്ഞു. ഉച്ചയ്ക്ക് ഒന്നിന് സമൂഹസദ്യയും 2.30 ന് സമിതി പ്രസിഡന്റ് എൻ.ശിവദാസൻ വസ്ത്രദാനവും നടത്തി. വൈകിട്ട് ദീപാരാധന, സമാധിപ്രാർത്ഥന എന്നിവയോടെ സമാധി ദിനാചരണത്തിനു സമാപനമായി.